Qısaıǵan úı súriletin bolsa, turǵyndardyń jaǵdaıy ne bolmaq

ALMATY. QazAqparat – Almaty ákimi Baqytjan Saǵyntaev «Zerdeli» shaǵynaýdanyndaǵy qısaıǵan úıdiń turǵyndarymen kezdesýde ǵımarat súrilgen jaǵdaıda ne bolatynyn túsindirdi, dep habarlaıdy QazAqparat.

Kezdesý barysynda ákim osyndaǵy 72 páterdiń turǵyndaryn kóshirýge daıyn ekenin jetkizgen bolatyn.

«Sheshim qabyldandy. Tıisti qaýly shyǵarylyp, qarajat bólinip jatyr. Bastapqy kezde ruqsat etseńizder, sizder úshin 72 páter jaldap beremiz. «Qajeti joq, ózimiz tabamyz» deseńizder, onda páter jaldaǵanyńyz týraly qujatyńyzdy kórsetesiz. Biz onyń jaldaý aqysyn tolyqtaı tólep beremiz. Aqsha aýdan ákimdiginiń esepshotyna túsedi. Birinshi jumys kúni – 18 jeltoqsan. Oǵan deıingi mereke kúnderi sizder ákimdikke aqsha aýdarylatyn bank kartasynyń nómirin usynýǵa tıissizder. Bul sharýany neǵurlym tezirek tyndyrsaq, soǵurlym jaqsy», - dedi Baqytjan Saǵyntaev.

Ákimniń aıtýynsha, atalmysh úıdiń taǵdyry tıisti saraptamadan keıin belgili bolady.

«Bir aıdan keıin mamandar úıdi qalpyna keltirýge bolady dese, biz ony qalpyna keltiremiz. Barlyq qyzmetterdi iske qosamyz. Al eger mamandar qorytyndysy ol úıde turýǵa bolmaıtynyn kórsetse, biz ol nysandy súrip tastaımyz. Barlyq páterdiń ıeleri ákimdik esebinen jańa páter alady. Kelisseńizder, bul iske búginnen bastap kirisemiz», - dep atap ótti shahar basshysy.

Ol, sondaı-aq, tonap ketpes úshin úıdi polıtseıler kúzetetinin jetkizdi. Odan bólek, Baqytjan Saǵyntaev «Zerdeli» shaǵynaýdanyndaǵy barlyq úıler tekseriletinin aıtyp ótti. Eger qandaı da bir aqaý tabylsa, jaýapty adamdar jazalanady.

Eske sala keteıik, 11 jeltoqsanda Alataý aýdanyndaǵy Zerdeli shaǵynaýdanynyń turǵyndary úıiniń qısaıǵanyn aıtyp, dabyl qaqqan bolatyn. Al qalalyq ákimdik arnaıy tekserý nátıjesinde turǵyndardyń alańdaýyna negiz joq ekenin aıtqan bolatyn.