Qys mezgilinde kólikti qalaı júrgizý kerek: Tájirıbeli mamannan 6 keńes
Aıazdy kúnderi aldymen kólikti iske qosý qajet. Qysta júrgizýshi úshin eń qaýipti nárse: túni boıy tómengi temperatýrada turǵan kóliktiń otalmaı qalýy. Osy oraıda, kólikti iske qospas buryn barlyq fýnktsııalaryn óshirip alǵan jón, ıaǵnı jaryq shamdarynyń, peshiniń jáne jylytý júıesiniń sóndirýli turǵanyna kózi jetkizip alyńyz.
Qozǵaltqyshqa batareıany paıdalaný. Kiltti buraǵan kezde, qozǵaltqyshty sál aınaldyryp turyńyz. Biraq ony 10 sekýndtan artyq ustamaǵan jón, áıtpese starterge zııany tııýi múmkin. Eger budan paıda bolmasa, birneshe mınýt kútip, qaıtalap kórińiz. Eger akkýmýlıator tolyq qatyp qalsa, onda avtomobıldegi basqa akkýmýlıatormen otaldyryp kórý kerek.
Jalpy, qys mezgiline kólikti ázirlegende sapaly akkýmýlıator qoıǵan abzal. Qosymsha akkýmýlıator alyp júrýdiń de artyqtyǵy joq.
Qystyń kúni kóliktiń terezesi jıi býlanady nemese aıazdan qyraý qatyp qalyp jatady. Mundaı bolmas úshin júrip kelgen kóliktiń esikterin birneshe mınýtqa ashyp qoıýǵa keńes beremiz. Sonda tańerteń tek áınekke túsken qardy sypyryp tastaısyz, boldy.
Shınalardyń aýa qysymy. Qorshaǵan aýanyń temperatýrasy tómendegen kezde, shınanyń da qysymy kemıdi. Sondyqtan, qysqy rezeńkeni aýystyrý arqyly shınanyń qysymyn rettep alǵan durys, óıtkeni durys qysymdy shınalar qaýipsiz jáne janarmaı únemdeýge múmkindik beredi.
Kóliktiń aınalaryn taza ustaý. Ras, tańǵy ýaqytta qyraý qatyp qalǵan aınany tazalaý birshama áýrege túsiredi. Bul oraıda, aınalardy aıazdyń alynda súrtip qoıýǵa keńes beremiz. Bul aınanyń jarylyp, syzylýyna jáne zaqymdanýyna jol bermeıdi, sonymen qatar muzdyń tez túsýine áser etedi.
Avtokólikti turaq tejegishine durys qoıý da mańyzdy. Júrgizýshiniń aıtýynsha, tejegish júıesi sýyǵansha birshama kútý kerek.
Aıta ketsek, kólik júrgizýshisi Qaırat Nurmaǵambetovtiń 46 jyl tájirıbesi bar. Eńbek jolyn Aqmola oblysyndaǵy Jarsýat aýylynan bastaǵan. Sonyń ishinde sońǵy 26 jylda Prezıdent is basqarmasy avtosharýashylyǵynda kólik júrgizip júr.