Qys keremeti: SQO-da qaı jerde shańǵy-konkı tebýge bolady

<p>PETROPAVL. KAZINFORM &ndash; Shańǵy teýip, konkıde syrǵanaý úshin qysty asyǵa kútetinder bar. Soltústik Qazaqstan oblysynda Petropavlda ǵana emes, ár aýdanda hokkeı korttary, shańǵyny jalǵa berý pýnktteri jumys isteıdi.&nbsp;</p>

Máselen Petropavlda shańǵyny Borkı kentinde ornalasqan shańǵy bazasynda, Qarǵaly aralynda jáne «Green Park» demalys bazasynda tebýge bolady. Borkıde shańǵy jalǵa beriledi. Tańǵy saǵat 9.00-den keshki 20.00-ge deıin jumys isteıdi. Eresekterge shańǵyny jalǵa alý baǵasy 2 myń teńge, jasóspirimderge 1,5 myń teńge, kishkentaılarǵa myń teńge turady.

Al konkıdi Vınokýrov sport saraıynda jalǵa alyp tebýge bolady. Turǵyndar úshin muz aıdyny senbi kúni saǵat 17.00 men 18.00 aralyǵynda jáne 18.30 ben 19.30 aralyǵynda jumys isteıdi. Al jeksenbi kúni birinshi seans 17.30-da, ekinshisi 19.00-de bastalady. Bul jerde konkıdi tebý eresekter úshin 1 myń teńgege, 14 jasqa deıingi balalar úshin 600 teńge turady. 

Foto: SQO dene shynyqtyrý jáne sport basqarmasy

K.Baıbolov atyndaǵy oblystyq mamandandyrylǵan balalar men jasóspirimderdiń sport mektebinde de konkıdi jalǵa alyp tebýge bolady. Munda konkıdi 1,5 saǵat tebý quny eresekter úshin myń teńge, balalarǵa 700 teńge turady. 

Petropavldaǵy turǵyn úı aýlalarynda da muz aıdyndary quıylmaq. 

- Bıyl aýlalarda ázirge 4 muz aıdynyn quıý josparlanǵan. Jalpy turǵyndar qalalyq sport bólimine habarlasyp, aýlalarynda hokkeı qoraby bolsa, muz aıdynyn jasata alady. Biraq ádette PIK tóraǵalary muz aıdynyn quıdyrýdan ózderi bas tartyp jatady.

Bıyl ázirge bul jumys qolǵa alynǵan joq, óıtkeni aýa temperatýrasy múmkindik bermeı tur. Sondyqtan konkıdi qazir Vınokýrov sport saraıynda ǵana tebýge bolady, - deıdi SQO dene shynyqtyrý jáne sport basqarmasynyń baspasóz hatshysy Nına Ýsenko.

Foto: SQO dene shynyqtyrý jáne sport basqarmasy

Mamannyń aıtýynsha, aýdandarda, balalar men jasóspirimderdiń sport mektepterinde shańǵy men konkıdi jalǵa berý pýnktteri jumys isteıdi. 

- Óńirde qysqy sport túrlerin damytýǵa jaqsy jaǵdaı jasalǵan. Petropavlda muz saraıy bar, Borkı kentinde shańǵy bazasy jumys isteıdi. Oblys boıynsha 271 hokkeı korty bolsa, sonyń 240-y aýdandarda ornalasqan, onyń 19-y jabyq.

Jalpy sportpen 225 myń adam aınalyssa, sonyń 12 myńy qysqy sport túrlerin tańdaǵan. Óńirde qysqy sport túrleriniń 10-y bar, onyń altaýy – olımpıadalyq, - deıdi Nına Ýsenko.

Buǵan deıin Petropavlda mektep tóbesiniń sylaǵy qulap, 3 bala zardap shekkenin jazǵan edik.