Qyrkúıek aıynda eńbek naryǵynda suranys tómendegen

<p>QR Eńbek jáne halyqty áleýmettik qorǵaý mınıstrligi otandyq eńbek naryǵyndaǵy ózgerister týraly málimetterdi jarııalady, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.</p>

«Qyrkúıek aıynda elektrondy eńbek bırjasynda 127 myń bos jumys orny jáne 113,8 myń túıindeme jarııalandy. Tamyz aıymen salystyrǵanda eńbek naryǵyndaǵy suranys azdap tómendegen (-1% nemese 1,7 myń bos jumys orny), al usynys áli de ósip jatyr (+8% nemese 8,8 myń túıindeme)», - dep jazylǵan mınıstrlik habarlamasynda.

Sondaı-aq, suranystyń tómendeýine qaramastan, qyrkúıek aıynda bilim berý uıymdary basqa salalarmen salystyrǵanda eń kóp bos jumys oryndaryn jarııalaǵan.

Bilim salasy ártúrli deńgeılerindegi mekemelerdiń bos jumys oryndary eńbek naryǵyndaǵy jalpy suranystyń úshten birin (33% nemese 41,8 myń bos jumys orny) quraǵan.

Óńirlik bóliniste qyrkúıek aıynda bos jumys oryndarynyń eń kóp artýy Shymkent qalasynda (+32% nemese 0,8 myń), Aqmola (+22% nemese 1,2 myń) jáne Qyzylorda (+15% nemese 0,5 myń) oblystarynda baıqaldy.

Al usynysqa kelsek, eńbek naryǵynda ornalastyrylǵan túıindemeler Shymkent qalasynda (+60% nemese 3,4 myń), sondaı-aq Túrkistan (+37% nemese 4,5 myń) jáne Qostanaı (+35% nemese 1,1 myń) oblystarynda kóp baıqalǵan.