Kırklend telefondy kótermeı qoıdy - Qanat Islam

ASTANA. QazAqparat - Búgin Astanaǵa ushyp kelgen WBO NABA men WBA Intercontinental belbeýleriniń ıegeri Qanat Islam aldaǵy jekpe-jekte óz qarsylasynyń ne sebepti aýysqanyn túsindirip berdi, dep habarlaıdy QazAqparat tilshisi.

Aıta keteıik, 21 maýsym kúni Astanada ótken baspasóz máslıxatynda Qanat Islam kelesi jekpe-jegin amerıkalyq boksshy Djeıms Kırklendke qarsy ótkizýdi josparlap otyrǵanyn málimdegen bolatyn. Alaıda sol kezde áli naqty kelisim bolmaǵan.
«Kırklend óz kelisimin bermedi. Negizi, biz onyń barlyq talaptaryn oryndaıtynymyzdy aıtqanbyz. Biraq sol beti telefonyn kótermeıdi. Menedjeri de, promoýteri de habarsyz ketti. Bálkim, aldaǵy jekpe-jekterde kezdesemiz», - dedi Islam búgin jýrnalısterge bergen suhbatynda.

9 qyrkúıek kúni Astanada ótetin boks keshinde Qanat Islam (24-0, 19KO) kanadalyq Brendon Kýkpen (18-0, 11KO) judyryqtasady. «Qazirgi kezde HBO arnasy tarapynan bizge suranys bar. Sondyqtan aldaǵy jekpe-jek álemdik boks shyńyna shyǵýǵa múmkindik beretin taǵy bir baspaldaq bolady. Sóıtip, boks áleminiń úlken tulǵasyna aınalamyn dep senemin», - dep atap kórsetti.

Aldaǵy boks keshi kezinde 8 qazaqstandyq boksshy óner kórsetedi. Olar -  Janqosh Turarov (21-0, 15KO), Jánibek Álimhanuly (1-0, 1KO), Meıirim Nursultanov (3-0, 2KO),  Rýslan Myrsataev (3-0, 3KO), Álı Ahmedov (7-0,5KO), Aıdos Erbosynuly (6-0, 6KO), Dımash Nııazov (11-0-3, 5KO) jáne Nursultan Jańabaev (2-0, 1KO). Barlyq boksshylarymyz osy ýaqytqa deıin birde-bir ret jeńilip kórmegen.