Kirister boıynsha jospar barlyq óńirlerde asyra oryndaldy - mınıstr

NUR-SULTAN. QazAqparat – Bıýdjetke kirister boıynsha josparlar barlyq óńirlerde asyra oryndaldy. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Salyqtyq emes túsimder boıynsha jospardy asyra oryndaý negizinen memlekettik organdar salatyn aıyppuldar, ósimpuldar, sanktsııalar jáne óndirip alýlar boıynsha qamtamasyz etilgen. Negizgi kapıtaldy satýdan túsetin túsimder boıynsha jospar negizinen aýktsıon ótkizý jolymen memlekettik materıaldyq rezervtiń materıaldyq qundylyqtaryn satý esebinen asyra oryndaldy», - dedi E. Jamaýbaev.

Onyń aıtýynsha, jergilikti bıýdjetterdiń kiristeri 116,8%-ǵa atqaryldy jáne 2 trln 191 mlrd teńgeni qurady. Jospar 315 mlrd teńgege, onyń ishinde salyqtar boıynsha – 264 mlrd teńgege asyra oryndaldy.

«Kirister boıynsha josparlar barlyq óńirlerde asyra oryndaldy», - dedi mınıstr.