Qyrylǵan ıtbalyqtardyń kóbi býaz bolǵan

<p>AQTAÝ. KAZINFORM &ndash; Qazaqstan Respýblıkasy gıdrobıologııa jáne ekologııa ınstıtýtynyń operatory jáne ekologııalyq aǵartý jónindegi mamany Ásel Baımuqanova Mańǵystaý oblysyndaǵy ıtbalyqtardyń ólimi boıynsha aldyn ala nátıjelerin jarııalady.&nbsp;</p>

Ásel Baımuqanovanyń aıtýynsha, Túpqaraǵan túbeginiń jaǵalaýynda 27 qyrkúıekten 30 qazanǵa deıin 305 óli ıtbalyq tabylǵan. 10 ushada (3%) mehanıkalyq zaqym bar. Bul ıtbalyqtar torlar men arqandarǵa shyrmalyp, bastary kesilgen. Mundaı zaqymdardyń keıbireýleri kezdeısoq bolýy múmkin, qalǵandary zańsyz aýlaýdyń saldary.

– Ólgen ıtbalyqtardyń kóbinde mundaı izder joq. Bizdiń qyzmetkerler ólimniń sebebin anyqtaýǵa kómektesetin zertteýler úshin synamalar aldy. Alaıda, ólekselerdiń qatty ydyraýy taldaý jasaýǵa múmkindik bermedi. Alańdatatyny, zerttelgen analyqtardyń jartysynan kóbi býaz bolyp shyqty. Sondaı-aq jas ıtbalyqtar ekeni kórinip tur. Sondyqtan ólim kenetten bolýy múmkin, - deıdi maman.

Ásel Baımuqanovanyń aıtýynsha, ıtbalyqtar kúzde kóbeıý úshin Soltústik Kaspııge aýysady. Olar teńizdiń osy bóliginde shoǵyrlaný kezinde ólgen. 

– Ólimniń sebepteri ártúrli bolýy múmkin: tabıǵı (jer silkinisi, tabıǵı gazdar shyǵaryndylary), tehnogendik (teńiz ýchaskeleriniń lastanýy), aýrýlar (epıdemııalar), - deıdi ol. 

Eger epıdemııa bolsa, ıtbalyqtar jappaı bir jerde ólýi tıis. Biraq ólekseler ár jerden tabylǵan. 

– Jaǵdaıdy jan-jaqty zertteý úshin ártúrli sala mamandary geologtardyń, munaı jáne gaz óndirý jónindegi mamandardyń, ekologtardyń, hımıkterdiń, toksıkologtardyń, vırýsologtardyń jáne basqalardyń saraptamasy qajet. Biz birge jumys isteý úshin jınalǵan barlyq materıaldy berýge daıynbyz. Shyǵaryndylar jalǵasýda. Arnaıy komıssııa 4-5 qarasha aralyǵynda taǵy 121 ıtbalyqtyń óleksesin tapty, - dep tolyqtyrdy Ásel Baımuqanova. 

Buǵan deıin, Ekologııa jáne tabıǵı resýrstar mınıstrligi ıtbalyqtarǵa qatysty alǵashqy saraptamanyń qorytyndysyn jarııalaǵany týraly jazǵan bolatynbyz.