Qyrǵyzstanmen shekarada bıýdjetten tys qarajat esebinen qoımalar salynady — Saýda mınıstrligi

<p>ASTANA. KAZINFORM &mdash; Saýda jáne ıntegratsııa vıtse-mınıstri Qaırat Tórebaev Jambyl oblysynyń Qordaı aýdanynda qurylysy josparlanǵan qoıma keshenine qatysty túsinik berdi.</p>

«Keshen birneshe óndiristik, saýda jáne logıstıkalyq alańdardan turady. Bul nysannyń Jambyl oblysynyń Qordaı aýdanynda ornalasýy shıkizattyń aıtarlyqtaı kólemine jáne damyǵan ınfraqurylymǵa baılanysty naqtylandy. Sút, et, kókónis, toqyma jáne farmatsevtıkalyq ónimder óndirisi boıynsha kooperatsııa jobalaryn iske asyrý úshin jaǵdaı jasalady. Sondaı-aq qurylatyn keshen Qyrǵyz Respýblıkasymen saýda-logıstıkalyq ınfraqurylymdy damytýǵa baǵyttalǵan», — dedi Q. Tórebaev Parlament Májilisinde ótken baspasóz máslıhatynda.

Onyń aıtýynsha, joba tolyǵymen bıýdjetten tys qarajat esebinen júzege asyrylady.

«2024 jyldyń 28 naýryzynda Jambyl oblysynyń ákimdigi keshendi basqaratyn ınvestordy tańdaýǵa konkýrs jarııalady. Sáýirdiń 19-y kúni qaıtalama konkýrs jarııalandy, biraq áli kúnge deıin ınvestor anyqtalmady. Sondyqtan taǵy da irikteý ótkiziledi. Investorǵa keshenniń qurylysymen qatar, ınjenerlik ınfraqurylymmen qamtamasyz etý boıynsha sharttar belgilendi», — dedi vıtse-mınıstr.

Budan buryn habarlanǵandaı, búgin Májilistiń jalpy otyrysynda «Qazaqstan Úkimeti men Qyrǵyzstan Mınıstrler kabıneti arasyndaǵy «Qarasý» men «Aq-tilek» avtojol ótkizý pýnktteri aýdanyndaǵy ındýstrııalyq saýda-logıstıkalyq keshenniń qyzmetin qurý jáne retteý týraly kelisimdi ratıfıkatsııalaý týraly» Zańy qabyldandy.