Qyrǵyzstandyq qylmys álemi serkesiniń aktıvterin Qazaqstannan izdeıdi

<p>Qyrǵyzstannyń ulttyq qaýipsizdik komıteti (UQK) Kamchy Asanbektiń (Kólbaev) uıymdasqan qylmystyq tobyn joıý boıynsha aldyn ala derekterdi jarııalady.&nbsp; Qylmystyq top kóshbasshysy men onyń týystarynyń zańsyz aktıvteriniń qatarynda 850-den astam jyljymaıtyn múlik, baǵaly buıym, onyń ishinde gaýhar tastary bar altyn táj bolǵan. <a href="https://kaz.inform.kz/" target="_blank" rel="noopener">Kazinform</a> agenttigi bul týraly <a href="https://kabar.kg/news/aktivy-kamchy-kol-baeva-sostavliaiut-1-mlrd-gknb-nachata-rabota-po-ikh-vozvratu/" target="_blank" rel="noopener">&laquo;Kabar&raquo;</a> agenttigine silteme jasap habarlaıdy.&nbsp;</p>

Bıyl 4 qazanda uıymdasqan qylmystyq top kóshbasshysy Kamchy Asanbek (Kólbaev) qarýmen qarsylyq tanytý kezinde kózi joıylǵany habarlanǵan bolatyn.

2008 jyldan bastap Kamchy Asanbek josparly jáne maqsatty túrde qylmys ımperııasyn qurǵan.

«K.Asanbektiń qylmystyq dárejesi men sheksiz qarjy resýrsy, sondaı-aq jazaǵa tartylmaýy oǵan ár jyldary eldegi saıası oqıǵalarǵa áser etýge múmkindik berdi. Bul ulttyq qaýipsizdikke úlken qaýip tóndirdi jáne qazirgi quqyqtyq memlekette mundaı jaǵdaıǵa oryn joq», - dep jazdy «Kabar» agenttigi.

K.Asanbektiń qylmys álemindegi abyroıy men qyzmeti ony zańsyz baıytyp, dollarlyq mıllıonerge aınaldyrdy. Al týystary men jaqyn adamdaryna qymbat jáne sheteldik aktıvterdi ıelenýge múmkindik berdi. Olardyń bul múlikti zańdy jolmen satyp alýǵa qarjylyq jaǵdaıy jetpeıtin edi.

Qylmystyq aktıvterin jasyrý maqsatynda K.Asanbek pen onyń jaqyndary kúzet agenttikteriniń atyn jamylyp zamanaýı qarýmen jáne quraldarmen jabdyqtalǵan qylmystyq top qurǵan. Bul qarý-jaraqtyń bári tergeý kezinde tárkilendi.

Qylmystyq top kóshbasshysy, onyń týystary men jaqyndarynyń menshiginde 850-den astam jyljymaıtyn múlik, onyń ishinde úlken jekejaılar, kottedjder, elıtaly klýbtyq úıler, salynyp jatqan nysandardaǵy kóptegen páter, demalys ortalyqtary, pansıonat, meıramhanalar, jer telimderi, atqoralar, ań aýlaıtyn jerler, lıýks sanattaǵy 60-tan asa avtokólik, onyń ishinde quryshpen qaptalǵandary bar, baǵaly buıymdar, onyń qatarynda gaýhar taspen bezendirilgen altyn táj jáne basqa da múlik boldy.

UQK qylmystyq jolmen tabylǵan múliktiń bir bóligin memleket menshigine aýdara bastady. Soǵylyp jatqan eki nysannyń ózinde K.Asanbektiń 700-den astam páteri bolǵan, onyń bári memleket menshigine ótedi.

Aldyn ala esep boıynsha, K.Asanbektiń zańsyz jolmen tapqan aktıvteriniń quny – 1 mlrd AQSh dollary. Onyń múlkine tolyqtaı tyıym salyndy.

K.Asanbek pen onyń jaqyndarynyń zańsyz aktıvterin el ishinde ǵana emes, shetelden, onyń ishinde Reseı, Qazaqstan, Grýzııa, Túrkııa, BAÁ (Dýbaı) jáne Japonııadan izdeý jalǵasady.