Qyrǵyzstanda Jogorký Kenesh depýtattarynyń merziminen buryn saılaýy ótedi

<p>BІShKEK. KAZINFORM &ndash; Qyrǵyzstanda Jogorký Keneshtiń Osh, Qara-Sýý jáne Batken bir mandatty saılaý okrýgterindegi birqatar depýtattyń ókilettiginiń merziminen buryn toqtatylýyna baılanysty parlamentke halyq depýtattarynyń kezekten tys saılaýy ótedi.</p>

Saılaý naýqany qazir júrip jatyr. Ol 2024 jylǵy 27 sáýir tańǵy saǵat 8-ge deıin jalǵasady. 15 sáýirden bastap okrýgterdegi saılaý komıssııalary kandıdattardyń saılaýshylarmen birlesken kezdesýin ótkizip jatyr.

Qyrǵyzstan Respýblıkasy Ortalyq saılaý komıssııasynyń málimetinshe, bir mandatty úsh okrýgte saılaýǵa 30 kandıdat qatysyp jatyr, onyń 10-y Batkende, 7-i Qara-Sýýda jáne 13-i Osh bir mandatty okrýgterinde.

Habarlanǵandaı, buǵan deıin barlyq kandıdat saılaýdy zań aıasynda ótkizý týraly memorandýmǵa qol qoıǵan. Oǵan sáıkes olar tek zań aıasynda áreket etýge, bir-birine, onyń ishinde áleýmettik jeliler arqyly «qara pıar» qoldanbaýǵa, daýys alý maqsatynda para alýdan jáne ákimshilik resýrstardy paıdalanýdan bas tartýǵa mindettengen.

Qyrǵyz Respýblıkasy Prezıdentiniń «№2 Batken bir mandatty saılaý okrýgi, №9 Qara-Sýý bir mandatty saılaý okrýgi, № 7 Osh bir mandatty saılaý okrýgi boıynsha Qyrǵyz Respýblıkasy Jogorký Keneshi depýtattarynyń kezekten tys saılaýyn taǵaıyndaý týraly» Jarlyǵyna sáıkes, Qyrǵyz Respýblıkasy Jogorký Kenesh depýtattarynyń kezekten tys saılaýy 2024 jyldyń 28 sáýirinde ótedi.