Qyrǵyzstanda jerdi zańsyz bergen eks-sheneýnikter ustaldy

<p>Bishkekte 19 qazanda &laquo;Kadastr&raquo; memlekettik mekemesiniń burynǵy basshylyǵy jer telimderin zańsyz bergeni úshin ustalyp, Qyrǵyz Respýblıkasy Ulttyq qaýipsizdik memlekettik komıtetiniń ýaqytsha ustaý oqshaýlaǵyshyna qamaldy.</p>

Kazinform agenttiginiń tilshisi bul týraly Qyrǵyz Respýblıkasy UQMK-ǵa silteme jasap habarlaıdy.

Vedomstvonyń málimetinshe, Qyrǵyz Respýblıkasy UǴA E.Gareev atyndaǵy Botanıkalyq saıabaq aýmaǵyndaǵy jer ýchaskelerin jeke menshikke zańsyz bergeni úshin «Kadastr» memlekettik mekemesi astanalyq fılıalynyń burynǵy dırektory «B.B.J.» jáne onyń orynbasary «Q.M.J.» ustaldy.

Qylmystyq isti tergeý aıasynda «Kadastr» MM men basqa ókiletti memlekettik organdardyń basshylyǵy materıaldyq paıda tabý maqsatymen Bishkek qalasy merııasynyń jalǵan qaýlysyn shyǵarý arqyly Qyrǵyz Respýblıkasy Ǵylym akademııasynyń «Kók-Jar» tájirıbelik bazasy balansyndaǵy jalpy aýdany 0,244 ga jer telimderin jeke menshikke berý boıynsha jemqorlyq shemasyn uıymdastyrǵany anyqtaldy.

Keltirilgen shyǵyn kólemi 31 mln somnan asty.

Habarlanǵandaı, atalǵan qylmysqa qatysy bar tulǵalardy anyqtaý, sondaı-aq zańsyz alynǵan jer telimderin memleketke qaıtarý boıynsha qajetti jedel-izdestirý sharalary jalǵasýda.