Qyrǵyzstanda tyıym salynǵan aýǵandyq sýsyn Qazaqstanda satylymnan shyǵarylmaıdy

<p>ASTANA. KAZINFORM &ndash; Aýǵanstanda óndiriletin anar dámdi Royal gazdalǵan sýsyny balalarǵa zııandy bolǵandyqtan Qyrǵyzstanda satýǵa tyıym salyndy. Alaıda, Qazaqstanda bul ónimdi nege satýǵa áli de ruqsat berip otyrǵanyn Kazinform agenttiginiń tilshisi anyqtady.&nbsp;</p>

Shilde aıynyń basynda Qyrǵyzstan densaýlyq saqtaý mınıstrligi janyndaǵy memlekettik sanepıdbaqylaý Royal anar sýsynynyń quramynda E122 azorýbın boıaǵysh zaty baryn málimdedi. Olardyń aıtýynsha, bul element balalardyń densaýlyǵyna keri áserin tıgizedi. 

Osh qalasyndaǵy saýda oryndaryndaǵy sýsyndar tárkilenip, saýda jelileriniń basshylaryna atalmysh sýsyndy satýǵa tyıym salynǵany týraly eskertý jasaldy. 

Bul málimdemege Qazaqstan tarapy da jaýap berdi. QR sanepıdbaqylaý komıtetiniń málimdeýinshe, atalǵan sýsynnyń elimizde satylýyna tyıym salýǵa quqyqtyq negiz joq. Vedomstvo ónimge zerthanalyq taldaý jasap, E122 Azorýbınniń gazdalǵan sýsyn óndirisine qoldanýǵa ruqsat etiletinin túsindirdi. Kedendik odaqtyń tehnıkalyq reglamentinde 1 kg ónimge 50 mg qoldanýǵa bolatyny aıtylǵan. 

– Eger kedendik odaqqa múshe elderdiń biri qandaı da bir ónimge shekteý qoıatyn bolsa, Eýrazııalyq ekonomıkalyq odaq tártibine saı EAEO múshe elderdiń bárine eskertýi kerek. Qyrǵyz respýblıkasynyń densaýlyq saqtaý mınıstrliginen biz mundaı habarlama almadyq, - dedi QR Densaýlyq saqtaý mınıstrligi Sanepıdbaqylaý komıtetiniń tehnıkalyq baqylaý jónindegi basqarmasynyń basshysy Aıgerim Sadýbaeva.

Sonymen qatar aýǵandyq ónimge qatysty vedomstvonyń belgili bir suraqtary da bar bolyp shyqty. Olardyń ónimi belgilengen markırovkaǵa saı bolmaı shyqty. Onda sýsynnyń ónimdik qundylyǵy, quramy jáne daıyndaýshysy týraly málimetter joq. 

– Biz aımaqtyq bólimshelerge barlyq kásipkerlik sýbektilerine atalǵan ónimniń sáıkestik deklaratsııasy joq bolǵandyqtan, ony satýǵa shyǵarmaı tura turýyn eskertýdi usyndyq, - dedi maman.

Ol ázirge ónimge shekteý qoıý úshin osy da jetkilikti, biraq oǵan tyıym salý úshin emes ekenin atap ótti. 

Al, Ózbekstan Aýǵanstannan ákelinetin Royal sýsynyn qaıta tekseretin boldy.