Qyrǵyzstanda TikTok jelisiniń jumysyna tyıym salynady

<p>ASTANA. KAZINFORM &ndash; Qyrǵyzstannyń Tsıfrlyq damý mınıstrligine qarasty baılanys salasyn retteý jáne qadaǵalaý qyzmeti ınternet-provaıderlerine TikTok áleýmettik jelisine kirýdi shekteýdi surap hat joldady.&nbsp;&nbsp;</p>

Eske sala keteıik, keshe atalǵan vedomstvoǵa eldiń Ulttyq qaýipsizdik memlekettik komıtetinen hat kelgen bolatyn.

Onda TikTok-tyń qyrǵyzstandyq segmentinde, atap aıtqanda balalarǵa arnalǵan aqparat keńistiginde «kontent tsenzýrasyna júıeli jáne prıntsıpti kózqaras joq» delingen. 

Sheneýnikter Balalardyń densaýlyǵyna, olardyń dene, rýhanı jáne adamgershilik damýyna zııan keltirýdiń aldyn alý sharalary týraly zańǵa silteme jasap otyr. 

«Qyrǵyz Respýblıkasy Úkimetiniń 2023 jylǵy 22 qyrkúıektegi № 501 qaýlysymen bekitilgen Radıojıilik belgileý erejesiniń 8-tarmaǵyna sáıkes balalardyń densaýlyǵyna, olardyń ıntellektýaldyq, psıhıkalyq, rýhanı-adamgershilik damýyna zııan keltirýdiń aldyn alý maqsatynda jáne «Baılanys týraly» zańnyń 21-1-babynyń negizinde Ulttyq qaýipsizdik jónindegi memlekettik komıteti Qyrǵyz Respýblıkasynyń aýmaǵynda TikTok aqparattyq qyzmetine qoljetimdilikti shekteýdi jáne 2024 jylǵy 18 sáýirge deıin jazbasha jaýap berýdi suraıdy» delingen mátinde. 

Aıta ketsek, Qyrǵyzstannyń Mádenıet mınıstrligi TikTok áleýmettik jelisin buǵattaý týraly ótinishti Tsıfrlyq damý mınıstrligine ótken jyldyń tamyz aıynyń sońynda joldady.

Vedomstvonyń atap ótýinshe, birqatar úkimettik emes uıymdar tarapynan balalardyń psıhıkalyq damýy men densaýlyǵyna keri áser etetin TikTok áleýmettik jelisiniń zııandy áseri týraly alańdaýshylyq bildirgen ótinishter kóbeıdi.

Bul sheshim qoǵamda da, sarapshylar arasynda da rezonans týdyrdy.

Tanymal áleýmettik jelige tyıym salý shaǵyn jáne orta bıznes máselelerin ýshyqtyrady, Qyrǵyz Respýblıkasyndaǵy sóz bostandyǵy men demokratııaǵa nuqsan keltiredi, jastardyń ózin-ózi tanytý múmkindikterin azaıtady degen pikir tarady.