Qyrǵyzstanda pedofılderge jaza kúsheıtildi

<p>BІShKEK. KAZINFORM &ndash; Qyrǵyzstan prezıdenti Sadyr Japarov kámeletke tolmaǵandardy zorlaǵany úshin jazany kúsheıtetin zańǵa qol qoıdy, atap aıtqanda 60 jastan asqan azamattar mundaı qylmystar úshin ómir boıyna bas bostandyǵynan aıyrylady. Bul týraly Qyrǵyzstan prezıdentiniń <a href="https://president.kg/news/all/25361" target="_blank" rel="noopener">baspasóz</a> qyzmeti habarlady.</p>

Qyrǵyzstan Respýblıkasynyń Qylmystyq kodeksi men Qylmystyq is júrgizý kodeksterine engizilgen ózgertýlerge sáıkes, qylmys jasaǵan kezde 60 jasqa tolǵan er adamdarǵa ómir boıyna bas bostandyǵynan aıyrý jazasy qarastyrylatyny habarlandy. Áńgime «balanyń jynystyq qol suǵylmaýyna jáne jynystyq bostandyǵyna qarsy» qylmys jasaǵandar týraly bolyp otyr. Buryn mundaı qylmysy úshin jasy 60-tan asqan adamdarǵa ómir boıyna bas bostandyǵynan aıyrý jazasy berilmegen.

«Zańǵa sáıkes Qyrǵyz Respýblıkasynyń Qylmystyq is júrgizý kodeksine ózgerister engizildi. Oǵan sáıkes, jazasyn óteýge kedergi keltiretin aýyr syrqatynyń bolýyna qaramastan, sot balanyń jynystyq qol suǵylmaýyna jáne jynystyq bostandyǵyna qarsy qylmys jasaǵany úshin aıyptaý úkimi shyǵarylatyny belgilep qoıyldy», – delingen habarlamada.

Túzetýlerdi parlament 11 sáýirde qabyldaǵan.

Qyrǵyzstanda jazanyń eń joǵary túri – ómir boıyna bas bostandyǵynan aıyrý bolyp eseptelinedi.