Qyrǵyzstanda memqyzmetke ornalasýshylardy jalǵan sóz detektorymen teksermek

<p>Qyrǵyzstanda memlekettik jáne mýnıtsıpaldyq qyzmet kandıdattaryn jumysqa qabyldaý kezinde polıgraf arqyly tekserýdi josparlap otyr. Bul týraly búgin &laquo;Kabar&raquo; agenttiginde ótken baspasóz máslıhatynda Qyrǵyz Respýblıkasynyń Memlekettik qyzmet jáne jergilikti ózin-ózi basqarý isteri jónindegi memlekettik agenttiginiń dırektory Qudaıbergen Bazarbaev málim etti, dep habarlaıdy Kazinform agenttigi.</p>

«Rezervke alý jáne mýnıtsıpaldyq jáne memlekettik organdardyń basshylyq laýazymdaryna taǵaıyndaý kezinde polıgraftan ótýdiń negizgi maqsaty – kandıdattyń sybaılas jemqorlyqqa qatysty alǵysharttaryn anyqtaý. Polıgraf memlekettik jáne mýnıtsıpaldyq qyzmetkerler arasyndaǵy sybaılas jemqorlyqqa qarsy kúreste qoldanylyp, patrıottardy bılikke tartýǵa kómektesedi. Búginde bul baǵytta tıisti normatıvtik-quqyqtyq aktiler ázirlenýde», - dedi ol.

Bazarbaevtyń sonymen qatar atap ótýinshe, agenttik bolashaq memlekettik qyzmetkerdiń boıynan kásibı, adamgershilik jáne psıhologııalyq qasıetterdi jan-jaqty baǵalaý, sondaı-aq IQ deńgeıi men kóshbasshylyq áleýetin anyqtaý maqsatynda bıyl eki mýltıpsıhometr satyp alǵan.