Qyrǵyzstanda qazaqstandyq kásipker Vladımır Jumanbaevqa izdeý jarııalandy
UQMK málimetinshe, tergeý amaldary aıasynda qylmystyq jolmen alynǵan kiristerdi zańdastyrý (jylystatý) faktisi boıynsha tirkelgen sotqa deıingi is júrgizý materıaldarynda Qazaqstannyń iri bıznesmenderiniń biri Vladımır Jumanbaevtyń «Aǵaıyndar ortasy» halyqaralyq qylmystyq tobynyń quramyna kirgen «Zańdaǵy ury» atalǵan Q.Asanbektiń uıymdasqan qylmystyq tobynyń qyzmetin qarjylandyrý faktileri anyqtalǵan.
«Atalǵan tulǵa Q.Asanbektiń qylmystyq qoǵamdastyqtyń quramyndaǵy kásipkerlerden reket, bopsalaý túrindegi zańsyz áreketterden júıeli túrde qarajat alýy, sondaı-aq aýyr qylmystar úshin birneshe ret sottalǵany, sondaı-aq onyń «adam óltirý», «adam urlaý» jáne «qylmystyq qoǵamdastyq (qylmystyq uıym) uıymdastyrý» baptarymen asa aýyr qylmystar boıynsha talaı ret sottalǵanyn bile tura, Qyrǵyz Respýblıkasynyń aýmaǵynda birlesken bıznes jobalardy júzege asyrý úshin qoldaý jáne qamqorlyq alý maqsatynda Q.Asanbekpen baılanys ornatqan», - delingen habarlamada.
«V.G.K.» JShS-niń Qyrǵyz Respýblıkasy aýmaǵyndaǵy altyn óndirýmen, kender men baǵaly metaldardy baıytýmen aınalysatyn ıesi bola otyryp, V.Jumanbaev altyn óndirýshi kompanııanyń jaýapty qyzmetkerleri arqyly Q.Asanbekke 2021-2023 jyldar aralyǵynda aı saıyn 1 mln som jiberip otyrǵan.
Іzdeýdegi azamat Q.Asanbekpen Ystyqkól oblysynda ornalasqan «Bars» demalys bazasynyń aýmaǵynda kezdesip, demalǵan. Bul jerge ol jeke ushaqpen kelgeni atap ótilgen.
Sotqa deıingi is júrgizýdi tergep-tekserý aıasynda «V.G.K» JShS qyzmeti kiristeriniń naqty kórsetkishterin jasyrý maqsatynda Qyrǵyz Respýblıkasynyń memlekettik organdaryna altyn kenin óndirý týraly jalǵan málimetter berý faktileri anyqtalǵan.
Bishkek qalasynyń Oktıabr aýdandyq sotynyń qaýlysymen V.Jumanbaevqa qatysty syrttaı qamaýǵa alý túrindegi bultartpaý sharasy tańdaldy.
Atalǵan tulǵaǵa qylmystyq qýdalaý úshin memleketaralyq izdeý jarııalandy.