Qyrǵyzstanda qaıtys bolǵandarǵa tas jáne mármárdan eskertkish qoıyp, taqtatas ornatýǵa tyıym salynady

<p>ASTANA.KAZINFORM - Qyrǵyzstan qaıtys bolǵan adamdy jerleý júıesin retke keltirmekshi. Qyrǵyz Respýblıkasynyń Prezıdenti Sadyr Japarov &laquo;Jerleý jáne jerleý rásimi týraly&raquo; Zańdy iske asyrýǵa baǵyttalǵan jarlyqqa qol qoıdy.</p>

Qazirgi qyrǵyz qoǵamynda máıitti jerleý kezinde shekten tys ysyrapshyldyq pen bos áýreshilik, basqa adamdardyń áleýmettik jaǵdaıyn eleýmeýshilik, sondaı-aq dinı ádet-ǵuryptar men dástúrlerdi bilmeýshilik oryn alatyny atalyp ótti. Marqumnyń týystary tastan, granıtten nemese mármárden záýlim kesene turǵyzyp, músinin ornatady, beıitterdi sándi metall qorshaýlarmen qorshaıdy.

Qaýlyǵa sáıkes, Qyrǵyz Respýblıkasy Musylmandary dinı basqarmasyna marqumdy jerleý dástúri men ádet-ǵuryptaryn retke keltirýge baǵyttalǵan tıisti pátýa shyǵarý usynyldy:

• musylman zırattarynyń aýmaqtarynda tarıhı-mádenı mańyzy bar jerleýlerdi qospaǵanda, tastan, granıtten, mármárden, metaldan jáne osy materıaldardyń qosyndysynan eskertkish, músin, qulpytastardy, qorshaýlardy salýǵa jáne ornatýǵa tyıym salý;
• qabir eskertkishteri men qorshaýlardyń aǵash materıaldardan jasalǵanyn jáne bıiktigi 70 santımetrden aspaıtyndaı etip jasaý. 

Memlekettik organdarǵa:

• úsh aı merzimde «Jerleý jáne jerleý rásimderi týraly» Qyrǵyz Respýblıkasynyń Zańyn is júzinde iske asyrý jóninde sharalar qabyldaý;
• zırattardy ornalastyrýǵa, jobalaýǵa jáne abattandyrýǵa, paıdalaný men kútip ustaýǵa, beıit eskertkishteriniń kólemine, olardy daıyndaýǵa jáne ornatýǵa arnalǵan materıaldarǵa qoıylatyn talaptardy retteıtin qala qurylysy qujattamasyn, úlgilik erejelerdi (nusqaýlardy) ázirleý jáne bekitý;
• dinı ádet-ǵuryptar men dástúrler negizinde qaıtys bolǵan adamdy jerleý jáne beıit eskertkishterin salýda ysyrapqa jol bermeý máseleleri boıynsha halyq arasynda turaqty túrde aǵartý jumystaryn júrgizý tapsyryldy.

Qyrǵyzstanda azamattardy jerleý tártibin retteý maqsatynda ómirden ótkenderdiń eskertkishi men belgilerin ornatý jónindegi nusqaýlyqty bekitý usynylyp jatqany buǵan deıin habarlanǵan bolatyn.