Qyrǵyzstanda qalalyq keńeshter saılaýyna qatysty saılaýaldy úgit-nasıhat jumystary bastaldy
Qyrǵyzstan Respýblıkasy OSK málimetinshe, aldaǵy jergilikti keńeshter saılaýyna qatysý úshin 39 saıası partııa tirkeldi, olar qalalyq keńeshter saılaýyna óz kandıdattarynyń 187 partııalyq tizimin usynǵan. Barlyǵy 4928 kandıdat tirkeldi, onyń 3183-i er adam jáne 1745-i áıelder, bul 35,41 %.
Atap ótilgendeı, 2024 jylǵy 18 qazannan bastap qalalyq keńeshter depýtattyǵyna kandıdattar, partııanyń ýákiletti ókilderi, senim bildirilgen tulǵalar, saıası partııalardyń músheleri jáne basqa da múddeli azamattar kandıdattardy (nemese kandıdattar tizimin) jaqtap nemese olarǵa qarsy daýys berý maqsatynda saılaýshylardy yntalandyrýǵa baǵyttalǵan aqparatty daıyndaý jáne taratý jónindegi qyzmetpen aınalysýǵa, kandıdattar men saıası partııalardyń saılaýaldy baǵdarlamalaryn erkin jáne jan-jaqty talqylaýǵa quqyly. Bul rette basty talap úgit-nasıhat júrgizý nysandary men ádisteri saılaý zańnamasynyń talaptarymen sáıkes bolýy kerek.
Eske sala ketsek, 2024 jyldyń 17 qarashasynda Qyrǵyzstanda jergilikti keńeshter, sondaı-aq Bishkek pen Osh qalalarynyń depýtattaryn saılaý ótedi. Qyrǵyzstan prezıdenti Sadyr Japarov 17 qarashada ótetin jergilikti keńes depýtattarynyń saılaýyna baılanysty halyqqa úndeý joldady.
Buǵan deıin Qyrǵyzstan Ulttyq qaýipsizdik memlekettik komıtetiniń tóraǵasy Qamchybek Tashıev jergilikti keńeshter depýtattyǵyna úmitkerlerdiń árqaısysynyń qylmysqa jáne sybaılas jemqorlyqqa qatysy bar-joǵyn muqııat tekserýdi tapsyrdy.