Qyrǵyzstanda ekonomıka jáne kommertsııa mınıstri orynbasarlarynyń jartysy qysqardy
Qyrǵyzstannyń Mınıstrler kabınetiniń basshysy qol qoıǵan buıryqqa sáıkes, Qyrǵyz Respýblıkasy Ekonomıka jáne kommertsııa mınıstriniń 4 orynbasary qyzmetinen bosatyldy. Olar: Kanatbek Abdrahmanov, Kýbanychbek Zakenaev, Chıngız Makeshov, Nazarbek Malaev.
Qyrǵyzstannyń Mınıstrler kabıneti baspasóz qyzmetiniń dereginshe, úkimet 14 shtatty – mınıstrlik pen atqarýshy bıliktiń 9 memlekettik organyndaǵy ákimshilik vedomstvo jetekshileriniń orynbasarlaryn qysqartty. Atap aıtar bolsaq, Ekonomıka jáne kommertsııa mınıstrligi, Qarjy mınıstrligi, Syrtqy ister mınıstrligi, Tótenshe jaǵdaılar mınıstrligi, Aýyl sharýashylyǵy mınıstrligi, Bilim jáne ǵylym mınıstrligi, Mádenıet, aqparat, sport jáne jastar saıasaty mınıstrligi, Tsıfrlyq damý mınıstrligi, Mınıstrler kabıneti janyndaǵy Áleýmettik qor.
Mundaı sheshim Qyrǵyz Prezıdentiniń «Respýblıkalyq bıýdjet shyǵynyn ońtaılandyrý, bıýdjet qarjysyn memlekettik organdar men jergilikti ózin ózi basqarý organdarynyń tıimdi paıdalanýyn arttyrý týraly» buıryǵy aıasynda qabyldandy.
Buǵan deıin eldegi Tabıǵat resýrstary, ekologııa jáne tehnıkalyq baqylaý mınıstrligi men Mınıstrler kabıneti janyndaǵy ıntellektýal menshik jáne ınnovatsııa memlekettik agenttiginde orynbasarlar sany qysqarǵan bolatyn.