Qyrǵyzstanda Asqar Aqaevtyń ýaqytsha depkomıssııa qurý týraly ótinishinen bas tartý usynyldy

<p>ASTANA.KAZINFORM - Jogorký Keneshtiń Konstıtýtsııalyq zańnama, memlekettik qurylym, sot-quqyqtyq máseleler jáne reglament komıteti burynǵy prezıdent Asqar Aqaevtyń ýaqytsha depýtattyq komıssııa qurý jáne eks-prezıdent mártebesin qalpyna keltirý týraly málimdemesin qarady, dep jazady<a href="https://kabar.kg/news/komitet-zhk-kr-rekomendoval-otkazat-askaru-akaevu-v-zaiavlenii-o-sozdanii-vremennoi-depkomissii/" target="_blank" rel="noopener"> Kabar</a> agenttigi.</p>

Komıtet tóraǵasy Cholpon Sultanbekova bul ótinishtiń Jogorký Keneshke 3 qyrkúıekte túskenin eske saldy.

Talqylaý barysynda depýtat Gýlıa Qojoqulova bul máseleni jan-jaqty zerdeleý úshin ýaqytsha depýtattyq komıssııa qurý qajettigin atap ótti. Depýtat Janar Aqaev Asqar Aqaevtyń tusynda elde otbasylyq-klandyq basqarý órkendep, Aqsyı oqıǵasy bolǵanyn eske aldy.

Talqylaý barysynda komıtet A.Aqaevtyń málimdemesin nazarǵa alyp, ony Jogorký Keneshtiń qaraýyna engizdi, sondaı-aq Jogorký Keneshke A.Aqaevtyń ýaqytsha depýtattyq komıssııa qurý týraly ótinishin qanaǵattandyrýdan bas tartýdy usyndy.

Asqar Aqaev Qyrǵyzstan parlamentinen eks-prezıdent mártebesin qaıtarýdy suraǵanyn jazǵan bolatynbyz.