Qyrǵyzstan prezıdenti jýrnalısterdiń jappaı ustalýyna qatysty pikir bildirdi

<p>Qyrǵyzstanda sóz bostandyǵy bolǵan, bar jáne bolady. Árıne, BAQ salasyn retteıtin zańdardy, eń aldymen ulttyq qaýipsizdikti saqtaý kerek. Bul týraly jaqynda ınternet-redaktsııalar tilshileriniń jappaı ustalýyna qatysty pikir bildirgen Qyrǵyzstan prezıdenti Sadyr Japarov &laquo;Kabar&raquo; aqparat agenttigine bergen suhbatynda aıtty.</p>

Sadyr Japarov elde sóz bostandyǵyn shekteý nemese qysym kórsetý áreketteriniń joqtyǵyn basa aıtty.

Onyń pikirinshe, BAQ salasyn retteıtin zańdardy jáne eń aldymen ulttyq qaýipsizdikti saqtaý qajet.

«Búginde qoǵamdyq pikirdi dástúrli jýrnalıstıkamen básekelesetin áleýmettik jeliler arqyly qalyptastyrý úırenshikti jaǵdaıǵa aınaldy. Mundaı jaǵdaıda jýrnalıst bolsyn, bloger bolsyn, árbir azamat qoǵamǵa paıdasyn tıgizýmen qatar, árbir taratqan sózi úshin jaýapty ekenin túsinýi kerek. Biz sapaly jýrnalıstik zertteýdi qoldaımyz. Biraq kóp jaǵdaıda blogerler faktilerdi burmalap, túımedeıdi túıedeı etedi, aıla-sharǵy jasap, qoǵamdy adastyrýmen aınalysady. Olardyń materıaldary boljalmen emes, faktilermen dáleldenýi kerek, olar qaýeset emes, aqparat alyp júrýi kerek», — dedi S.Japarov.

Ol sondaı-aq búgingi aýmaly-tókpeli zamanda sóz bostandyǵy jaýapkershilikpen qatar júretinin aıtty.

Onyń sózinshe, qazirdiń ózinde damyǵan demokratııalyq elder sóz bostandyǵyn saıası maqsattarǵa qol jetkizý úshin paıdalanyp, qoǵamdy turaqsyzdandyrýshylarǵa qatysty shekteýler engizip jatyr.

«Osyǵan baılanysty biz aldyn alý sharalaryn qabyldaýǵa májbúrmiz, óıtkeni bul eldiń ulttyq qaýipsizdigine tikeleı qatysty», - dedi S.Japarov.

Ustalǵandarǵa qatysty jaǵdaıǵa toqtalǵan Memleket basshysy qamaýǵa alynǵan 11 adam kásibı jýrnalıst emes, áleýmettik jelilerdi paıdalanyp, túrli aqparat, sonyń ishinde eldiń ulttyq qaýipsizdigine qater tóndiretin aqparatty jaýapsyz jarııalaıtyn bloger ekenin atap ótti.

«Kez kelgen quqyqtyq memlekettegideı Qyrǵyz Respýblıkasynda zań aldynda jaýapkershilik bar. Osyǵan oraı, aqparattyń senimdiligi úshin árbir adam, eń aldymen ózin jýrnalıst, bloger sanaıtyndar jaýapty bolýy kerek. Jekelegen blogerler men belsendilerdiń ashyq ótirik, jalǵan aqparat taratqanyna talaı ret kýá boldyq. Aımaqtyq, dinı jáne ulttyq arazdyqty ádeıi nemese bilmeı qozdyrý, sondaı-aq Konstıtýtsııaǵa qaıshy jáne tártipsizdikterge shaqyrý áreketteri jıi boldy», - dedi ol.

Sadyr Japarovtyń habarlaýynsha, kloop.media, «Medıahab», kaktus.media, «PolıtKlınıka», factcheck.kg, T-Media jáne basqa da birqatar aqparat agenttigi jyl saıyn sheteldik donorlardan 600 myń AQSh dollarynan astam grant, ıaǵnı qarajat alady.

Onyń aıtýynsha, jalpy alǵanda, 2017-2020 jyldar aralyǵynda Demokratııany qoldaý ulttyq qory qyrǵyz úkimettik emes uıymdarynyń ókilderine, jýrnalıster men blogerlerge 8 471 614 dollar aýdarǵan.

«Bul grant sóz bostandyǵy, BAQ-qa qoldaý kórsetý, táýelsiz jýrnalıstıkany damytý jobalary aıasynda bólinip otyrǵanyn túsinemiz. Alaıda is júzinde tıisti granttyq qarajat óz maqsatyna ıgerilmeı jatyr. Úkimetti, memlekettik saıasatty qaralaý, qoǵamdy úgitteý, Konstıtýtsııaǵa qarsy úndeý jasaý, jalpyulttyq qaýipsizdikke qater tóndiretin jalǵan aqparat taratý saıasaty júrgizilýde», - dep túsindirdi prezıdent.

Sadyr Japarov qoǵamdaǵy pikir plıýralızmin jaqtap, memlekettiń ydyraýyna, ıaǵnı jaýapkershiliksiz bostandyqqa qarsy ekenin aıtty.

Onyń pikirinshe, bostandyq Qyrǵyzstannyń múddesin qorǵaýy kerek.

Eske sala ketsek, 17 qańtarda Bishkekte Birinshi Maı aýdandyq sotynyń tergeý sýdıasy sheshim shyǵaryp, 11 BAQ ókilin eki aıǵa qamady. Olar el astanasyndaǵy № 1 tergeý ızolıatorynda bolady.