Qyrǵyzstan premeri jylý elektr ortalyǵyndaǵy jaǵdaı boıynsha birqatar tapsyrma berdi
Otyrystyń qorytyndysy boıynsha memlekettik organdarǵa kelesi tapsyrmalar berildi:
- Qyrǵyz Respýblıkasynyń Energetıka mınıstrligine Bishkek qalasynyń ákimdigimen birlesip, jedel shtabty basqarý jáne saǵat 17:00-ge qaraı oqıǵanyń sebepteri týraly barlyq aqparatty, qalalyq JEO-nyń tolyqqandy jumys isteýin qamtamasyz etý úshin aldaǵy is-sharalar josparyn usyný;
- Qyrǵyz Respýblıkasynyń Tótenshe jaǵdaılar mınıstrligi men Sáýlet, qurylys jáne turǵyn úı-kommýnaldyq sharýashylyq memlekettik agenttigine JEO-nyń zaqymdanǵan nysandaryn qalpyna keltirý jumystaryn bastaý;
- Qyrǵyz Respýblıkasynyń Densaýlyq saqtaý mınıstrligine JEO-da zardap shekken jumysshylarǵa qajetti kómek kórsetýdi erekshe baqylaýǵa alý;
- Qyrǵyz Respýblıkasynyń Qarjy mınıstrligine qalpyna keltirý jumystaryna qajetti qarajatty jedel túrde bólý.
Mınıstrler kabıneti basshysynyń atap ótýinshe, qazirgi kezde negizgi mindet – qala turǵyndarynyń úılerine jylý berý jáne osyǵan uqsas jaǵdaılardyń qaıtalanýyna jol bermeý.
Eske sala ketsek, búgin túnde Bishkektegi jylý ortalyqtarynyń birinde apat boldy.
Mınıstrler Kabınetiniń Tóraǵasy – Qyrǵyz Respýblıkasy Prezıdenti ákimshiliginiń basshysy Aqylbek Japarov Almatyǵa jumys saparyn toqtatyp, jedel shtabtyń otyrysy ótip jatqan Bishkekke oraldy.
Qyrǵyzstan Respýblıkasy TJM málimetinshe, apattyń shyǵý sebebiniń eki nusqasy qarastyrylyp jatyr. Onyń biri – dıversııadan bolýy múmkin, ekinshisi – tehnogendik jaǵdaı.
Apat saldarynan 5 adam zardap shekti, olar aýrýhanada jatyr. Qalalyq JEO aımaǵynda tótenshe jaǵdaı jarııalandy.
Qyrǵyzstan prezıdenti Sadyr Japarov túnde apat bolǵan Bishkek jylý elektr ortalyǵyndaǵy qalpyna keltirý jumystarynyń barysymen tanysty.