Qyrǵyzstan men Tájikstan memleket shekarasyn shegendeý máselesin talqylady

<p>Búgin Qyrǵyz Respýblıkasy Batken oblysy Batken qalasynda Qyrǵyzstan men Tájikstan Respýblıkasy úkimettik delegatsııa tóraǵalary Qamshybek Tashıev pen Saımýmın ıAtımovtyń qyrǵyz-tájik memlekettik shekarasyn belgileý jáne shegendeý boıynsha kezdesýi ótti, dep habarlaıdy Kazinform agenttiginiń menshikti tilshisi.</p>

QR Mınıstrler kabıneti baspasóz qyzmetiniń deregi boıynsha, kezdesý barysynda eki memlekettiń úkimettik delegatsııa basshylary qyrǵyz-tájik shekarasynyń qalǵan bólikterin belgileý máselesin talqylaýdy jalǵastyrdy.

Olar Qyrǵyzstan men Tájikstan úkimettik delegatsııalary jumys toptaryna ortaq shekarany bekitý jáne shegendeý boıynsha kelissózdi júzege asyrýǵa qatysty naqty tapsyrma berdi.

Tájikstan men Qyrǵyzstannyń 970 shaqyrymǵa sozylatyn ortaq shekarasy bar ekenin eske sala keteıik. Oǵan qosa júzdegen shaqyrym shektesý syzyǵy áli anyqtalyp, bekitilmegen. Taraptar kezektese otyryp bir-biriniń aýmaǵynda kezdesý ótkizedi.

Jeltoqsanda eki el delegatsııalarynyń basshylary úkimetaralyq komıssııa jumysynyń qorytyndysy boıynsha memlekettik shekaranyń 90 paıyzdan astamy boıynsha kelisimge kelgenin málimdegen bolatyn.