Qyrǵyzstan men Tájikstan bir shaqyrymnan astam shekara bóligin bekitti

<p>ASTANA. KAZINFORM - Qyrǵyz Respýblıkasy men Tájikstan Respýblıkasynyń úkimettik delegatsııalary Qyrǵyz-Tájikstan memlekettik shekarasyn delımıtatsııalaý jáne demarkatsııalaý máseleleri boıynsha qosymsha 1,11 shaqyrym memlekettik shekara syzyǵy týraly kelisimge keldi. Bul týraly Qyrǵyzstan Respýblıkasynyń mınıstrler kabıneti habar taratty.</p>

«11-18 aqpan aralyǵynda Tájikstan Respýblıkasynyń Soǵdy oblysynyń Býston qalasynda Qyrǵyz Respýblıkasy men Tájikstan Respýblıkasynyń Úkimettik delegatsııalarynyń shekaralardy belgileý jónindegi quqyqtyq máseleler boıynsha topografııalyq jumys toptarynyń kezekti otyrysy ótti. Qyrǵyz-tájik memlekettik shekarasyn demarkatsııalaý júrgizildi», - delingen habarlamada.

Topografııalyq jumys toptary qyrǵyz-tájik memlekettik shekarasynyń 1,11 shaqyrymdyq syzyǵy boıynsha kelisti. Taraptar Qyrǵyz Respýblıkasynyń aýmaǵynda ótetin kelesi kezdesýde qalǵan baǵyttardy sıpattaý jumysyn jalǵastyrady. Otyrys qorytyndysy boıynsha tıisti hattamaǵa qol qoıyldy.

Esterińizge sala keteıik, Tájikstan men Qyrǵyzstannyń 970 shaqyrymdyq ortaq shekarasy bar. Taraptardyń kezdesýleri bir-biriniń aýmaǵynda kezektesip ótkiziledi. 2023 jyldyń qazan aıynan bastap qazirgi ýaqytqa deıin eki eldiń úkimetteri qyrǵyz-tájik memlekettik shekarasynyń 110 shaqyrymnan astamyn shegendedi. Topografııalyq jumys toptarynyń sońǵy otyrysy 2024 jyldyń aqpan aıynyń basynda Qyrǵyz Respýblıkasynyń Batken qalasynda ótip, onda memlekettik shekaranyń 3,71 shaqyrymy kelisildi.