Qyrǵyzstan qazaq dıqandaryna jarty mlrd tekshe metr sý beredi
Bıyl sýarý maýsymynda elimizge Qyrǵyzstannan Shý ózeni arqyly 180 mln tekshe metr jáne Talas ózenimen 380 mln tekshe metr sý keledi.
Sý resýrstary jáne ırrıgatsııa mınıstri Nurjan Nurjigitov quramyna qos memlekettiń ókilderi kiretin Shý-Talas sý sharýashylyǵy komıssııasynyń 33-shi otyrysynda tıisti kelisimge qol jetkizdi.
Sondaı-aq, kezdesý barysynda taraptar Shý jáne Talas ózenderindegi sý sharýashylyǵy nysandaryn jóndeý-qalpyna keltirý jumysynyń túrleri men kólemi týraly da kelisimge keldi.
Esterińizge sala keteıik, osyǵan deıin Qazaqstan men Ózbekstannyń sý vedomstvolary elimizge «Dostyq» memleketaralyq kanaly arqyly 922 mln tekshe metr sý berý jóninde mámile jasaǵan bolatyn.
«Halyqaralyq yntymaqtastyq — bizdiń mınıstrlik jumysynyń negizgi baǵyttarynyń biri. Sýarý maýsymyna daıyndyq barysynda elimizdiń ońtústigindegi sharýalardy sýdyń qajetti kólemimen qamtamasyz etý úshin aýqymdy jumys atqaryldy, kórshi memlekettermen mańyzdy kelissózder júrgizildi. Búgingi tańda Qyrǵyzstannyń sý resýrstary mınıstrliginiń basshylyǵymen maýsymnyń úshinshi onkúndiginen bastap Shý jáne Talas ózenderi arqyly sý berýdi ulǵaıtý týraly ýaǵdalastyqqa qol jetkizildi. Qazirgi ýaqytta qyrǵyz áriptesterimizben birlesip sý berý kestesin ulǵaıtý baǵytynda túzetý jumystary júrgizilip jatyr», — dedi QR Sý resýrstary jáne ırrıgatsııa mınıstri Nurjan Nurjigitov.