Qyrǵyzstan ıntım qyzmet kórsetetin oryndardyń bárin jappaq

<p>Osy jyldyń 1 jeltoqsanynan bastap Qyrǵyzstanda ıntım qyzmet kórsetetin barlyq orynnyń jumysyna tyıym salynady. Bul týraly Qyrǵyzstan ulttyq qaýipsizdik memlekettik komıtetiniń basshysy Qamshybek Tashıev málim etti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aıta keterligi, búgin Ystyqkól oblysynyń Balyqshy qalasynda Ulttyq qaýipsizdik memlekettik komıtetiniń qalalyq ákimshiliginiń jańa ǵımaraty ashylǵan bolatyn.

Onyń ashylý saltanatyna komıtet basshysy Qamshybek Tashıev qatysyp, vedomstvo qyzmetkerlerine birqatar mindet júktedi.

Onyń atap ótýinshe, azamattarǵa ıntım qyzmet kórsetetin túrli kóńil kóterý oryndaryn, monsha keshenderin uıymdastyrýdaǵy zańǵa qaıshy is-áreketterdiń aldyn alýdaǵy memorgandardyń qyzmetine baqylaý jasaý — komıtet qyzmetkerleriniń basym mindetteriniń biri bolmaq.

Osyǵan oraı Qamshybek Tashıev memlekettik jáne jergilikti organdarǵa, quqyq qorǵaý organdarynyń basshylaryna mundaı oryndardyń jumysyn respýblıkanyń búkil aýmaǵynda 2023 jyldyń 1 jeltoqsanyna deıin toqtatýdy tapsyrdy.

UQMK basshysynyń atap ótýinshe, ıntımdik qyzmet kórsetetin orynnyń odan ary jumys istep turǵany jaıly aqparat túsken jaǵdaıda jergilikti ózin-ózi basqarý organdarynyń jáne quqyq qorǵaý organdarynyń basshylary qyzmetinen bosatylady.