Qyrǵyz tarıhynda Olımpıada fınalyna shyqqan tuńǵysh boksshy kim

<p>PARIJ. KAZINFORM — Frantsııa astasy Parıj qalasynda ótip jatqan Olımpıada oıyndarynda qyrǵyzstandyq boksshy tuńǵysh ret tórtjyldyq basty dodanyń fınalynda altyn medal úshin jekpe-jekke shyǵady.</p>

Ol — 57 keli salmaqta Qyrǵyzstan namysyn qorǵap kele jatqan Munarbek Seıitbekuly.

Qyrǵyz boksshysy jartylaı fınalda bolgarııalyq Haver Dıaz Ivanezdi 4:1 esebimen qapy qaldyryp, Parıj Olımpıadasynyń fınalyna shyqty. 

Al 1 tamyz kúni Kýba sportshysy Saıdel Hortany jeńip, shırek fınalǵa ótken bolatyn. 

Odan keıin 4 tamyzda AQSh-tan shyqqan álem chempıony Djamal Harvıge qarsy judyryqtasyp, taǵy da jeńiske jetti.

Al, búgin 9 tamyzda Munarbek Seıitbekuly Bolgarııadan kelgen qarsylasyn utyp, Olımpıada oıyndarynyń fınalyna joldama aldy.

Endi ol 11 tamyzǵa qaraǵan túni Ózbekstannyń qazirgi Azııa jáne álem chempıony Abdýmalık Holokovqa qarsy jekpe-jek ótkizedi.

Munarbek Seıitbekuly — 2017 jyldan beri Qyrǵyzstannyń ulttyq boks quramasynyń múshesi. 

2018 jylǵy stýdentter arasyndaǵy bokstan álem chempıonatynyń qola júldegeri, 2018 jylǵy Qyrǵyzstan chempıony, 2019 jyly Ekaterınbýrgte jáne 2021 jyly Belgradta ótken álem chempıonattaryna qatysqan. 

2023 jyly Tashkentte ótken álem chempıonatynyń qola júldegeri. Osy jeńisinen keıin Qyrǵyzstan prezıdenti Sadyr Japarov sportshyǵa eki bólmeli páter syılaǵan.

Munarbek Seıitbekuly 2023 jyldyń qorytyndysy boıynsha Qyrǵyzstannyń eń úzdik sportshysy atanǵan.