Qyrǵyz Respýblıkasy Parıjde tarıhı júldesine qol jetkizdi

<p>PARIJ. KAZINFORM &mdash; Frantsııa astasy Parıj qalasynda ótip jatqan Olımpıada oıyndarynda Qyrǵyzstan quramasy 2 kúmis, 4 qola medal ıelendi.</p>

Bul elden áıelder kúresinen Meıirim Jumanazarova men boksshy Munarbek Seıitbekuly kúmis medal enshilese, grek-rım kúresinen Jolaman Sharshenbekov, Aqjol Mahmýdov, Ýzýr Jýzýpbekov, áıelder kúresinen Aısulý Tynybekova qola júldege qol jetkizdi.

Ókinishke qaraı, qyrǵyzdar Olımpıada oıyndarynan ázirge altyn medal ala almaı keledi. Dese de, Parıjde boksshy Munarbek Seıitbekuly qyrǵyz tarıhyna bokstan alǵashqy kúmis júldeni syılady. Ol altynǵa bir qadam qalǵanda Ózbekstannyń qazirgi Azııa jáne álem chempıony Abdýmalık Holokovqa qarsy jekpe-jekte utyldy.

Biraq, eline tarıhı medal syılady. Osyǵan deıin Qyrǵyz eli bokstan Olımpıada oıyndarynda júldege ilige almaı kelgen bolatyn. 

Munarbek Seıitbekuly bokstan Qyrǵyzstan namysyn 57 keli salmaqta qorǵady.

Qyrǵyz boksshysy jartylaı fınalda bolgarııalyq Haver Dıaz Ivanezdi 4:1 esebimen qapy qaldyryp, Parıj Olımpıadasynyń fınalyna shyqqan bolatyn.

Munarbek Seıitbekuly — 2017 jyldan beri Qyrǵyzstannyń ulttyq boks quramasynyń múshesi. 2018 jylǵy stýdentter arasyndaǵy bokstan álem chempıonatynyń qola júldegeri, 2018 jylǵy Qyrǵyzstan chempıony, 2019 jyly Ekaterınbýrgte jáne 2021 jyly Belgradta ótken álem chempıonattaryna qatysqan.

2023 jyly Tashkentte ótken álem chempıonatynyń qola júldegeri. Osy jeńisinen keıin Qyrǵyzstan prezıdenti Sadyr Japarov sportshyǵa eki bólmeli páter syılaǵan.

Munarbek Seıitbekuly 2023 jyldyń qorytyndysy boıynsha Qyrǵyzstannyń eń úzdik sportshysy atanǵan.