Qyrǵyz prezıdenti: Bılikti kúshtep aýystyrýǵa negiz joq
«Búgingi kúni bılikti ózgertýge negiz joq. Biz buǵan qandaı da bir sebepterdiń paıda bolýyna jol bermeımiz. Tlekmat Kúreńov (qyrǵyz belsendisi — red.) olardyń kóp ekenin aıtyp júr. Biz bárin bes saýsaǵymyzdaı jaqsy bilemiz. Joǵaryda aıtqanymdaı, olardyń artynda tutas toptar tur. Ony ózderi de jasyrmaı aıtyp júr. Buryn nelikten bılik ózgerdi? Bıliktiń ózi urylar men krımınalǵa jaqyn boldy. Eldi klandar, jerlester men týystar basqarǵanyn, olardyń ekonomıkany tonap, sazǵa batyrǵanyn, ádil emes saılaý ótkizgenin kórgen halyqtyń shydamy taýsyldy. Revolıýtsııanyń sebebi osy boldy», — dedi Sadyr Japarov.
Qyrǵyz prezıdenti buǵan jol bermeıtinin, adal jáne ashyq saılaý ótkizýge erik-jigeri jetetinin aıtty.
«Basqa memleketter bıýlletendi áli de qolmen sanaıdy, biz budan áldeqashan ketip qaldyq. Saılaýshylardy kóbeıtý úshin bıýlletendi birinen ekinshisine laqtyrý endi múmkin emes. Avtomattandyrylǵan ýrnalar birden nátıjesin kórsetedi. Osydan keıin ǵana baqylaýshylardyń qatysýymen qolmen sanaý júrgiziledi», — dedi ol.
Sondaı-aq, S. Japarov jaqyn týystaryn memlekettik basqarý júıesine tartpaǵanyn, ekonomıkalyq kórsetkishter ósip kele jatqanyn atap ótti.
«Buqara halyqty tartyp, tártipsizdik uıymdastyrýdy maqsat etkenderge jaýap qatal bolady. Biz aldyn alý úshin jumys isteımiz jáne halyqty jınap, olardy jasyryn atýǵa nemese jarylys uıymdastyrýǵa daıyn shabýyldaýshylardy anyqtaımyz. Olar úshin eń qatań jaza bolady. Bizge deıingiler sekildi olarmen balasha sóılesip otyrmaımyz. Biz úshin memleket pen qarapaıym halyqtyń qaýipsizdigi birinshi orynda tur. Al bılikke kelgisi keletinderge aıtarym, muny zańdy túrde, saılaýǵa qatysý arqyly jasaǵanyńyz jón», — dedi Sadyr Japarov.