Qyrǵyz elinde ne bolyp jatyr – oqıǵaǵa sholý
13 mamyr
Dál osy kúni Bishkektegi hostelderdiń birinde ornalasqan pákistandyq qonaqtar men jergilikti turǵyndar arasynda tóbeles bolǵan.
Sverdlov aýdandyq ishki ister basqarmasynyń málimetinshe, úsh sheteldikke qatysty Qyrǵyz Respýblıkasy Qylmystyq kodeksiniń 280-baby 2-bóligi 1-tarmaǵy boıynsha qylmystyq is qozǵalǵan. Kúdiktiler Bishkek polıtsııasynyń ızolıatorynda qamaýda otyr.
17 mamyr
Keshke qaraı hosteldiń janyna álgi sheteldikterden «kek alyp, sazaıyn berýge» keı málimet boıynsha 300-ge jýyq jas jınalǵan. Osydan keıin kúdikti úsh sheteldik vıdeo arqyly qyrǵyz halqynan keshirim surady. Degenmen, tótenshe jaǵdaıdyń aldyn alý úshin sý atqyshy bar ishki áskerler 7 sáýir-Shý kósheleriniń qıylysynda tosqaýyl bolyp turdy. Olar 7 sáýir kóshesin soltústik baǵytta qorshaýǵa alǵan. Qorshaýdy buzýǵa umtylǵandardyń ustalǵany týraly da málimet bar.
18 mamyr
Qyrǵyz Respýblıkasynyń Mınıstrler kabıneti Bishkektegi túngi oqıǵaǵa baılanysty málimdeme jasap, ondaǵy etnıkalyq alaýyzdyq pen tártipsizdik týdyrý áreketterin qatań aıyptady.
Málimdemede Mınıstrler kabıneti áleýmettik jelilerde shyndyqqa janaspaıtyn aqparattyń taralýyna baılanysty pikir bildirip, sondaı-aq halyqaralyq baspasózdiń sheteldik stýdentterge qatysty kisi óltirý men zorlyq-zombylyq týraly jalǵan habarlamalaryn joqqa shyǵarady.
Quqyq qorǵaý organdary Bishkekte bolǵan quqyq buzýshylyqtardyń barlyq mán-jaıyn jan-jaqty tekserip jatqanyn atap ótti. Kináliler anyqtalyp, zańǵa sáıkes jaýapqa tartylady. Sonymen qatar keıingi birneshe aıda bılik zańsyz kóshi-qondy aýyzdyqtaý jáne qalaýsyz adamdardy elden shyǵarý úshin sheshýshi sharalar qabyldap jatqanyn habarlady.
«Sheteldik stýdentterge tózbeýshilikti týdyrýǵa baǵyttalǵan kez kelgen áreketke jol berilmeıdi jáne bul bizdiń halqymyzdyń qonaqjaılyq rýhyna sáıkes kelmeıdi. Qyrǵyz Respýblıkasynyń bıligi qaýipsizdikti qamtamasyz etý, beıbitshilik pen turaqtylyqty saqtaý úshin barlyq qajetti sharalardy qabyldady. Quqyq qorǵaý kúshteri qoǵamdyq tártipti buzý áreketteriniń jolyn kesetin bolady», - delingen úkimet habarlamasynda.
Qyrǵyzstan UQMK tóraǵasy Qamshybek Tashıev te jaǵdaıǵa qatysty túsindirme berdi. Onyń aıtýynsha, tún ishinde 18 ben 25 jas aralyǵyndaǵy jastar jınalǵan. Oǵan Pákistan, Bangladesh, Úndistan, Mysyr jáne basqa elderden kelgen mıgranttardyń kóbeıýine alańdaýshylyq sebep bolǵan. Qamshybek Táshıev jınalǵandardyń talaptaryn qoldap, respýblıkanyń zańdaryn buzǵan sheteldikter boıynsha UQMK júrgizip jatqan jumys jaıly aıtqan.
«Bizde mıgranttar arasyndaǵy quqyq buzýshylyqtar týraly statıstıka bar. Muny negizinen Pákistan men Bangladesh azamattary jasaıdy. Aıtalyq, 1 500-den astam pákistandyq jáne myńnan astam Bangladesh azamat elden shyǵaryldy. Bizdiń deregimiz boıynsha, 5 myńǵa jýyq sheteldik zańdarymyzdy buzdy, onyń ishinde 1 360 pákistandyq, 1 300 bangladeshtik bar, qalǵandary - basqa memleketterden», - dedi Qamshybek Táshıev.
Keıinirek belgili bolǵandaı, oqıǵa saldarynan 29 adam medıtsınalyq kómekke júgingen, onyń 15-i qalalyq jedel járdem aýrýhanasy men ulttyq aýrýhanaǵa jetkizilgen, qalǵandaryna sol jerde kómek kórsetilgen.
Dál osy kúni Pákistan premer-mınıstri Shahbaz Sharıf Qyrǵyz Respýblıkasynyń astanasynda bolǵan sheteldik azamattarǵa qatysty oqıǵany basa nazarda ustap otyrǵanyn aıtty.
«Bishkek qalasyndaǵy pákistandyq stýdentterge qatysty jaǵdaıǵa qatty alańdap otyrmyz. Men Pákistan Elshisine barlyq qajetti qoldaý men kómek kórsetýdi tapsyrdym. Elshilikpen baılanystamyz jáne jaǵdaıdy únemi qadaǵalap otyramyz», - dep jazdy Shahbaz Sharıf H jelisinde.
Sál keıinirek áleýmettik jelide Qyrǵyzstannyń joǵary oqý oryndarynda bilim alyp jatqan pákistandyq stýdentterdiń Qazaqstanǵa qonys aýdaratyndyǵy týraly málimet jeldeı tarady. Bul habarǵa elimizdiń Ulttyq qaýipsizdik komıtetiniń baspasóz qyzmeti den qoıyp, mundaı aqparattyń shyndyqqa janaspaıtyndyǵyn málimdedi.
«Qazaqstan-Qyrǵyzstannyń memlekettik shekarasyndaǵy ótkizý beketteri shtattyq rejımde jumys istep tur. Qazaqstan men Qyrǵyzstannyń shekarashylary Bishkekte oryn alyp jatqan ahýalǵa qatysty únemi aqparat almasyp otyr», - dep habarlady komıtetten.
Munan bólek, PTV News Pákistan Qyrǵyzstannan 180 stýdentti arnaıy ushaqpen tasymaldaǵanyn habarladydy.
«KA571 arnaıy reısi Qyrǵyzstannan 180 pákistandyq stýdenttiń alǵashqy partııasyn ákelip, Lahor áýejaıyna aman-esen qondy», - delingen PTV News áleýmettik jelidegi akkaýntynda.
PTV News arnasynyń habarlaýynsha, stýdentterdi áýejaıda federaldyq ishki ister mınıstri qarsy alǵan.
19 mamyr
Qyrǵyz Respýblıkasy Syrtqy ister mınıstri Jeenbek Kýlýbaev pen Pákistannyń Syrtqy ister mınıstrliginiń basshysy Mohammad Ishak Dar telefon arqyly sóılesti.
Qyrǵyz Respýblıkasy Syrtqy ister mınıstrliginiń habarlaýynsha, áńgimelesý barysynda taraptar dástúrli dostyq sıpattaǵy jáne ekijaqty deńgeıde birtindep damyp kele jatqan eki eldiń qarym-qatynasyn ártúrli salalarda, sondaı-aq halyqaralyq jáne aımaqtyq uıymdar sheńberinde (BUU, ShYU, IYU jáne t.b.) nyǵaıtýǵa daıyn ekendikterin atap ótti.
Qyrǵyz Respýblıkasynyń syrtqy saıasat basqarmasynyń basshysy 18 mamyrda Bishkekte sheteldik stýdentterdiń, sonyń ishinde Pákistan azamattarynyń qatysýymen bolǵan oqıǵa týraly habardar etip, qoǵamdyq tártip tolyǵymen qamtamasyz etilgenin jáne jaǵdaı quzyrly organdardyń baqylaýynda ekenin basa aıtty.
Sonymen birge, qyrǵyz tarapy osy oqıǵaǵa jáne Qyrǵyz Respýblıkasyndaǵy jaǵdaıǵa qatysty jalǵan jáne negizsiz aqparattyń sheteldik BAQ-ta, áleýmettik jelilerde, sonyń ishinde Pákistanda taralyp jatqanyna qatty alańdaýshylyq bildirdi. Jeenbek Kýlýbaev senimdi aqparatty paıdalanýdyń, sondaı-aq Qyrǵyz-Pákistan qarym-qatynasyna nuqsan keltirýi múmkin Pákistannyń aqparattyq keńistiginde jalǵan aqparat pen jarııalanymdardyń jolyn kesý boıynsha tıisti jumystardy júrgizýdiń mańyzdylyǵyn atap ótti.
Pákistan Syrtqy ister mınıstrliginiń basshysy jaǵdaıdy tolyq túsinetinin jáne Qyrǵyz Respýblıkasy Mınıstrler kabınetiniń Qyrǵyz Respýblıkasyndaǵy qoǵamdyq tártip pen pákistandyq stýdentterdiń qaýipsizdigin qamtamasyz etý boıynsha qabyldaǵan tıimdi sharalary úshin alǵysyn bildirdi. Sonymen qatar olardyń Qyrǵyzstan Respýblıkasyndaǵy pákistandyq stýdentterdiń qaýipsizdigin qamtamasyz etýge daıyn ekenin jetkizdi. Sondaı-aq taraptar 2024 jyly 21 mamyrda Astana qalasynda (Qazaqstan) ShYU Syrtqy ister mınıstrleri keńesi aıasynda ekijaqty kezdesý ótkizetinin, jýyrda Bishkekte Qyrǵyz Respýblıkasy men Pákistan arasyndaǵy konsýldyq-quqyqtyq máseleler boıynsha mınıstrlikaralyq konsýltatsııalardy birlese uıymdastyratynyn sóz etti.
Qyrǵyzstan men Pákistan Syrtqy ister mınıstriliginiń basshylary sóz sońynda eki el arasyndaǵy dostyq pen yntymaqtastyqty nyǵaıtý jolynda birlese jumys isteıtin atap ótti.
Osy kúni Qyrǵyzstan men Pákistan syrtqy ister mınıstrleri 21 mamyrda Astanada kezdesetindigi belgili boldy. Qyrǵyz Respýblıkasy Syrtqy ister mınıstrliginiń baspasóz qyzmeti málimetinshe, QR Syrtqy ister mınıstriniń orynbasary Avazbek Atahanov pen Pákistan Islam Respýblıkasynyń Qyrǵyz Respýblıkasyndaǵy Elshisi Hasan Álı Zaıgamnyń kezdesýi ótken. Taraptar Qyrǵyz Respýblıkasynyń Syrtqy ister mınıstri Jeenbek Qulýbaev pen Pákistan premer-mınıstriniń orynbasary – Syrtqy ister mınıstri Mohammad Ishak Dardyń kezdesýin 21 mamyrda Astanada ótetin ShYU Syrtqy ister mınıstrleri keńesi aıasynda uıymdastyrýǵa kelisken.
20 mamyr
QR Mınıstrler kabıneti tóraǵasynyń orynbasary Edıl Baısalov 18 mamyr kúni buzaqylardyń shabýylyna ushyraǵan Qyrǵyzstan halyqaralyq ýnıversıtetiniń Medıtsına fakýlteti jataqhanasyna bardy. Onda ol jaǵdaıǵa baılanysty alańdaýshylyq tanytyp otyrǵan stýdenttermen kezdesip, saýaldaryna jaýap berdi.
Sonymen qatar ol stýdentter turyp jatqan bólmelerdi aralap kórdi.