Qyran baptap, tazy ósirgen 13 jastaǵy qyzylordalyq oqýshy

<p>QYZYLORDA. KAZINFORM - Qyzylorda oblysy Shıeli aýdanynyń 13 jastaǵy turǵyny Saıanbatyr Tálipov kishkentaıynan júırik baptap, qusbegilikke áýes bolǵan. Qazirgi ýaqytta jas óren qazaqtyń ulyq tutqan ónerine myqtap den qoıǵanyn aıtady.&nbsp;</p>

Saıanbatyrdyń ákesi Baǵdat ony eki jasynan bastap atqa mingizip, jylqy malyna jaqyn bolýyna baýlypty. Óse kele ony san alýan ulttyq oıyn-saýyqqa qatystyrýǵa nıet tanytqan. Búginde Saıanbatyr kókpar men báıgeniń shabandozy bolyp, kópshiliktiń jyly yqylasyna bólenip júr. 

Ákesiniń aıtýynsha, balasy kishkentaıynan jylqy malyn jaqsy kórip, daladaǵy erkindikti sezinip ósken. Atqa minse arqalanyp ketetin perzentin ol osylaısha júırik baptap, onyń qyr-syryna qanyǵýǵa jaqyn etip ósirdi. Qyzyǵýshylyq tanytqan ulyna qazir bilgenin úıretip, ulttyq dástúrdi ulyqtaýǵa baýlyp keledi. 

Sondaı-aq Saıanbatyr qusbegilik ónerge de jaqyn ekenin ańǵartyp otyr. Kókte qalyqtaǵan qustyń tilin tabýǵa umtylǵan jetkinshek bul ónerge degen árbir derekke kóz salyp, oı-tanymyn keńeıtýge yqylas tanytady. Perzentiniń osyndaı qyzyǵýshylyǵyn baıqaǵan ákesi Baǵdat oǵan uıadaǵy qyran qustyń balapanyn ákelip bergen. Qazir Saıanbatyr ákesimen birge ańshylyqqa shyǵyp, qus baptaýdyń qyr-syryn úırenip júr. Qumaı tazyny qasyna ertip, qyran qustyń ańǵa túskenin kórip, oljasyn túz daladan izdeýde. 

«Ulttyq salt-dástúrdi zertteı júrip, jylqymen baılanysty sport túrlerine nazar aýdardym. Keıin ákem uıadan qarshyǵanyń balapanyn ákep berdi. Oqyǵan jáne estigen málimetterdi tájirıbe júzinde iske asyrýǵa múmkindik týdy», - deıdi Saıanbatyr.

Qyran baptaý – otbasylyq úrdis. Buǵan deıin de ákeli-balaly uıadan balapan ákelip, qolǵa úıretip, keıin erkindikke jiberetin bolǵan.