Kınoprokattaǵy otandyq fılmderdiń úlesin kóbeıtý kerek – Úkimet basshysy

ASTANA. QazAqparat - Búgin Úkimet otyrysynda QR Premer-Mınıstri Álıhan Smaıylov Mádenıet jáne sport mınıstrligine birqatar tapsyrma berdi, dep habarlaıdy QazAqparat tilshisi.

«Buqaralyq sportty damytýdy, salamatty ómir saltyn nasıhattaýdy kóterý qajet. Sonymen qatar, jalpy kınoprokattaǵy otandyq fılmderdiń úlesin jáne qoǵamdyq mańyzy bar ádebıetti basyp shyǵarý men taratýdy kóbeıtý qajet. Mádenıet jáne sport mınıstrligi bul jumysty tıisti deńgeıde oryndaýy kerek», - dedi Á. Smaıylov Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde.

Onyń aıtýynsha, týrıstik salanyń áleýetin arttyrý úshin Mádenıet mınıstrligi ınfraqurylymdy damytý jáne qyzmet kórsetý servısin jaqsartý máselelerin keshendi sheshý jónindegi sharalardy ázirleýi qajet.

«Zańnamany jetildirý, onyń ishinde eldi mekenderden tys jerlerde jáne ulttyq parkterdiń aýmaqtarynda ınfraqurylym salý isi boıynsha ákimdikterdiń quzyretterin zań aıasynda naqty bekitip berý kerek. Sonymen birge bul salany kásipqoı ári bilikti kadrlarmen qamtamasyz etý mańyzdy. Eń basty másele – qolaıly týrıstik klımatty qalyptastyrý. Mınıstrlik «Atameken» palatasymen birlesip, osy salada bıznes júrgizý úshin barynsha qolaıly jaǵdaı jasaý máselelerin pysyqtaýy qajet», - dedi Premer-Mınıstr.