Kıno sıýjeti dersiń: tikushaqqa qol bulǵap belgi bergen otbasy qutqaryldy
14 sáýir kúni sý tasqynynan jan saýǵalaǵan otbasy óz kóligimen jaqyn ornalasqan aýylǵa jetýdi maqsat etken. Alaıda, kólik ishine sý kirip, aqyry batyp ketken. Tyǵyryqqa tirelgen otbasy bıik jerge barýdy jón sanap, 2 shaqyrym jerde ornalasqan munarany betke alady. Ondaǵy oılary – tómennen qul bulǵasaq tikushaqtaǵy ushqyshtardyń nazaryna túsemiz degen úmit.
Bes balamen munaraǵa jetý muń bolǵan. Eń kenjesi – 3 aılyq. Áýpirimdep júrip dittegen jerge áreń jetken turǵyndar ózderi oılaǵandaı ushqyshtardyń kózine túsip, aman qaldy. Tańǵy 8-de jolǵa shyqqan otbasy 16.00-de qutqarylyp, Yrǵyz aýdanyndaǵy mektepterdiń birine ornalastyrylǵan.
«Tikushaq burylyp kele jatqanda qýanyp kettim. Kóp kúttik. Ózimdi emes, balalarymdy oılap qoryqtym. Qumnyń qasyna uıyqtadyq. Ózimiz tońsaq ta, ústimizdegi kıimdi sheship, úsh aılyq balany qymtap amal qyldyq. Balalar túgili ózimiz sharshadyq. Eki shaqyrym jerde ornalasqan taýǵa jetemiz degenshe.. Jyńǵyl, saı-sala, balalar qulap. Sý, tamaq surady. Júregimiz aýyryp, «qazir vertolet keledi, sok, anaý-mynaý ákeledi» dep ótirik aldap, áıteýir taýǵa jettik. Tikushaqtaǵy azamattarǵa alǵysymyzdy bildiremiz. Alla razy bolsyn! Osyndaı qıyn-qystaý kezeńde el úshin kúni-túni eńbek etip júrgen jandarǵa rızashylyǵymyzdy bildiremiz. Elimizde mundaı apat endi bolmasyn!» - deıdi kózine jas alǵan ana.
Tikushaqta bolǵan maıor Beıbarys Ibraev sol kúni 5 jerden adamdardy qutqaryp, joldan toǵyz adamnyń qol bulǵap turǵanyn kórip qalǵanyn aıtady.
«Baılanys joq, ınternet joq. Sý tasyǵan ýaqytta úıden qashyp shyǵyp, jolda adasyp ketken. Munaranyń astynan qol bulǵaǵanyn kórip qalyp, qutqaryp aldyq. Bes balamen dalada qalǵan. Ekıpajyma raqmet. Osyndaı qıyn sátterde turǵyndarǵa kómek kórsetip, batalaryn alǵanymyzǵa qýanyshtymyz», - deıdi ol.
Sý tasqyny aıaqtalar. Shyǵyn óteler. Al bul oqıǵa elimizde sońǵy 80 jylda bolmaǵan sý tasqyny jaıly túsiriletin fılmniń sıýjetine suranyp turǵandaı...