Kıno ortalyǵyna ulttyq dep tanylýǵa úmitti 500-den astam kınojobaǵa ótinim berilgen
Qazirgi kúni Ortalyq konkýrsqa usynylǵandardy óńdeýge kirisken. Bul týraly QazAqparat «Ulttyq kınony qoldaý memlekettik ortalyǵy» KEAQ baspasóz qyzmetine silteme jasap habarlaıdy.
Ortalyqtaǵy Óndiris bóliminiń sarapshysy Bıjan Ábishevtyń aıtýynsha, bıyl 450 kompanııadan 503 ótinim kelip túsken. «Ádettegideı, «Kórkem fılmder» sanatyndaǵy ótinimder sany kóp, bıyl – 231. «Derekti fılmder» sanatynda – 86, «Qysqa metrajdy fılmder» sanatynda - 73, «Birlesip shyǵarylatyn fılmder» sanatynda - 58, «Anımatsııa» sanatynda - 35, «Debıýt» sanatynda - 31, «Avtorlyq/arthaýstyq kıno» sanatynda - 25 ótinim kelip tústi.
Naqtylap keteıik, elimizdiń eń iri kınostýdııasy «Sháken Aımanov atyndaǵy «Qazaqfılm» AQ bıyl 45 ótinim tapsyrdy. 2019 jyly ótkizilgen Kıno ortalyǵynyń pıtchıngine 109 ótinim qabyldanǵan. 2020 jyly 226 ótinim kelip túsken. Al bıyl 503 ótinim, sany jyl saıyn artýda», - deıdi B. Ábishev.
Onyń sózine qaraǵanda, bıyl Kıno ortalyǵy ótinimder qabyldaý talaptaryn birshama jeńildetken. Oǵan sáıkes, birinshi kezeńde qatysýshylar stsenarııdi, avtorlardyń túıindemelerin, óndiriske suratylatyn somany qamtıtyn aldyn-ala qujattar paketin ǵana tapsyrýy kerek. Konkýrstyń kelesi kezeńinde prezentatsııa, smeta, nıet sharttary men t.b. qujattardy qamtıtyn tolyq paketti daıyndaý qajet bolady.
«Qazir biz tehnıkalyq jumysty aıaqtap jatyrmyz, sodan keıin stsenarıılik ótinimder olardyń kórkemdik mazmuny boıynsha baǵalanady. Bul úshin Saraptama keńesi jobalardy aldyn ala baǵalaý boıynsha jumys júrgizedi. Sodan keıin pıtchıngke jiberiletin jobalardyń tizimin anyqtaımyz, onda konkýrsqa qatysýshylar óz jobalaryn Saraptama keńesiniń múshelerine tanystyra alady. Pıtchıngti ótkizgennen keıin hattamalardy óńdep, Vedomstvoaralyq komıssııanyń qaraýyna ótetinderdiń tizimin jasaımyz.
Aıta keteıin, jeńimpazdar Saraptama keńesiniń qorytyndysy men quramyna mınıstrlikterdiń basshylary, Parlament Senatynyń, Májilisiniń depýtattary kiretin Vedomstvoaralyq komıssııa usynymynyń negizinde aıqyndalady. Bul komıssııa óz jumysynda, eń aldymen, memlekettik múddelerdi saqtaýǵa jáne kınojobalardaǵy QR zańnamalyq normalaryn buzýshylyqtardy anyqtaýǵa baǵdarlanady», dep atap ótti Bıjan Ábishev.
Eske sala ketetin jaıt, memlekettik qarjylandyrýdan úmitti kınojobalardy odan ári irikteý kezinde eskeriletin mańyzdy máseleler bar. Olardyń ishinde Qazaqstan Táýelsizdiginiń 30 jyldyq mereıtoıyna arnalǵan fılmder jasaý da bar.
«Árıne, túsirilim tobynyń kásibıligi, prodıýser men rejısserdiń tájirıbesine de nazar aýdarylady», deıdi B. Ábishev.