Kıno óndirýshilerdi «ulttyq» mártebesine saı kontent jasaýǵa baǵyttaýymyz kerek - Esetjan Qosýbaev
Qazaqstan Respýblıkasy Prezıdentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń otyrysy barysynda «Ulttyq kınony qoldaý memlekettik ortalyǵy» KEAQ basqarma tóraǵasy Esetjan Qosýbaev otandyq kınoındýstrııany damytýǵa qatysty mańyzdy máselelerdi qozǵady.
Onyń aıtýynsha, biz - álemdik qurylymnyń túbegeıli ózgerýiniń, álemniń kóptegen memleketteriniń qoǵamdyq-saıası qalyptasýynyń tek kýágeri ǵana emes, tikeleı qatysýshysymyz.
«Tarıhı jáne mańyzdy oqıǵalarǵa toly dáýir tez ótip barady, olar, shyǵarmashylyq tilmen aıtqanda, dekoratsııalar, natýralyq lokatsııalar men akterleri dınamıkalyq túrde aýysatyn jahandyq spektakl nemese áserli blokbaster ispettes. Bul rette tek passıonarlyq kezeńderdi ǵana emes, sonymen birge kelesideı tarıhtaǵy dramalyq sátterdi de tereń jáne kásibı túrde kórsetetin ádebı, kórkem, beıneleý týyndylarynyń, teatr jáne sahnalyq qoıylymdardyń shyǵarylýy ózekti ekeni sózsiz»,-deıdi ol.
Sonymen qatar, ol búgingi Qazaqstannyń tarıhy mańyzdy jahandyq oqıǵalarǵa toly ekenin atap ótti.
«Atalǵan tarıhtyń negizgi kezeńderi rýhanı jáne áleýmettik-mádenı saladaǵy materıaldyq jáne materıaldyq emes aktıvterde oryn alýǵa tolyq quqyly. Munda, árıne, mádenı-ındýstrııalyq ónim retindegi ámbebaptyǵyn eskere otyryp, kınonyń róli men múmkindikterine kúmán keltirýge bolmaıdy»,-deıdi Esetjan Qosýbaev.
Onyń sózinshe, otandyq kıno salasy 2001 jyldan 2020 jylǵa deıin el bıýdjetimen shamamen 70 mlrd teńge kóleminde qarjylandyrylǵan.
«Árıne, halyqaralyq kınofestıvalderde úlken jetistikterge jetip, eń bedeldi halyqaralyq kınosyılyqtardyń qysqa tizimine engen sátti nátıjeler bolǵany sózsiz, degenmen, eger biz bul jetistikterdi memlekettiń, dálirek aıtsaq, salyq tóleýshilerdiń, halyqtyń qaltasynan bólingen qoldaýmen salystyratyn bolsaq, onda «taý tolǵatyp, tyshqan týdy» deýge bolady. Búginde Mádenıet jáne sport mınıstrliginiń, UKQMO, «Qazaqfılm» kınostýdııasynyń basty mindeti – kórsetilgen qamqorlyqqa naqty jáne nátıjeli jaýap berý. Qazaqstan kınematografy óziniń túrli segmentterimen osy mańyzdy salada júrip jatqan barlyq úderisterdiń álemdik júıesindegi óz ustanymy men ornyn anyqtaýy kerek. Halyq aqshasy úshin jaýapkershilikti sezinbesten, bıýdjetti tek tutynýshylyq turǵydan qabyldaý - bul sózdi aıtýǵa qoryqpaımyn, baryp turǵan azǵyndyq»,- deıdi ol.
«Ulttyq kınony qoldaý memlekettik ortalyǵy» KEAQ basqarma tóraǵasy kıno salasyna qatysty óz usynystaryn aıtty.
«Prezıdent atap ótkendeı, álemdegi eń iri kınoóndirýshi jáne strımıngtik kompanııalar Azııaǵa qyzyǵýshylyq tanytyp otyr. Jańartylǵan Zańǵa biz kınoserıal, kınospektakl uǵymdaryn engizgimiz keledi. Búginde dál osy janrlar kórermen arasynda úlken suranysqa ıe. Bizdiń kıno óndirýshilerdi «ulttyq» degen mártebege saı kontentti jasaýǵa baǵyttaýymyz kerek. Bul tarıhı taqyryptaǵy fılmder, Qazaqstannyń uly qaıratkerleri týraly áleýmettik mańyzy bar, jastarǵa arnalǵan derekti týyndylar, halyqaralyq kıno naryǵyna shyǵatyn balalarǵa arnalǵan anımatsııalyq kartınalar. Ortalyq «Altyn Orda» atty iri jobany iske asyrýǵa daıyndyqty bastady. Árıne, bul - kıno qaıratkerleriniń, memlekettik qurylymdardyń, álemdik kıno ortalyqtarynyń seriktesteriniń ekstensıvti emes, irgeli tásildemelerin, ıaǵnı halyqaralyq konsortsıým qurýdy talap etetin úlken órshil habarlandyrý. Qazaqstan Táýelsizdiginiń 30 jyldyǵy kınematograftyń barlyq janrlarynda eń joǵary ıdeıalyq-kórkemdik deńgeıde kórinis tabýy tıis»,- deıdi spıker.
Aıta keteıik, keshe Qyrymbek Kósherbaevtyń tóraǵalyǵymen qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń otyrysy ótti.