Kınematografııa salasyndaǵy qarajattyń 70 paıyzy tarıhı, patrıottyq kartınalarǵa baǵyttalmaq

NUR-SULTAN. QazAqparat – Qazaqstanda kınematografııa salasyna bólinetin qarajattyń 70 paıyzy tarıhı, patrıottyq kartınalarǵa baǵyttalmaq. Bul týraly Mádenıet jáne sport mınıstri Aqtoty Raıymqulova málim etti, dep habarlaıdy QazAqparat tilshisi.

«2021 jyly kınematografııa salasynda jyl saıynǵy memlekettik qarjylandyrýdyń jalpy kóleminiń 70%-yn tarıhı, patrıottyq jáne ımıdjdik kartınalarǵa, al qalǵan 30%-y mólsherindegi qarajatty jeke kınojobalardy jáne jas talanttardyń debıýttik fılmderin qarjylandyrýǵa baǵyttaý kózdelgen. Osy arqyly kınoóndiris salasynda jańa bıýdjettik saıasatty iske asyrý jónindegi jumysty jandandyrylady», - dedi Aqtoty Raıymqulova mınıstrliktiń alqa májilisinde.

Onyń aıtýynsha kıno óndirisine jyl saıyn bólinetin memlekettik qarajattyń kúrdeli qoıylymdy tarıhı fılmder shyǵarý úshin keminde 50%-yn «Qazaqfılm» kınostýdııasyna jiberýge múmkindik beretin normany zańnamalyq deńgeıde kózdeý qajet. Sonymen qatar, Memleket basshysynyń tapsyrmasyn iske asyrý aıasynda jaqyn arada Sháken Aımanov atyndaǵy «Qazaqfılm» AQ modernızatsııasyn sapaly júzege asyrý kerek.