Kimge qandaı quziret berildi - Qazaqstandaǵy taǵaıyndaýlar

ASTANA. QazAqparat - Aǵymdaǵy aptanyń ishinde memlekettik apparatta aıtarlyqtaı aýys-túıister bolǵan joq. Degenmen, aldaǵy ýaqytta ondaı taǵaıyndaýlar bolýy ábden múmkin. Sebebi Memleket basshysy Nursultan Nazarbaev kóshi-qon salasynda birqatar memlekettik organdardyń ókilettilikterin bir-birine aýystyryp, kóshi-qon qyzmeti boıynsha arnaıy komıtetti ashý týraly Jarlyqqa qol qoıdy, dep habarlaıdy QazAqparat tilshisi.

Qujatqa sáıkes, buǵan deıin ulttyq ekonomıka mınıstrliginde bolǵan birqatar mindettemeler densaýlyq saqtaý jáne áleýmettik damý mınıstrligine beriletin boldy. Atap aıtqanda, kóshi-qon salasyndaǵy memlekettik saıasatty qalyptastyrý, shet memleketterdiń ýákiletti organdarymen jáne halyqaralyq uıymdarmen kóshi-qon protsesterin retteý salasyndaǵy yntymaqtastyqty uıymdastyrý fýnktsııalary ekinshi densaýlyq mınıstrliginiń quziretine enip otyr. Al ishki ister mınıstrligine kóshi-qon salasyndaǵy memlekettik saıasatty vedomstvoaralyq úılestirý, kóshi-qon protsesterin baqylaý, taldaý jáne boljamdaý ókilettilikteri berilmek. Sonyń aıasynda Kóshi-qon qyzmeti komıteti qurylady.

Degenmen, oralmandar men qonys aýdarýshylardy qabyldaýǵa, sondaı-aq sheteldik jumys kúshin tartýǵa arnalǵan kvotalardy qalyptastyrý jumysy densaýlyq saqtaý jáne áleýmettik damý mınıstrliginiń quziretinde qala beredi. Memleket basshysy  memlekettik organdar arasynda shtat sanyn qaıta bólip, sáýirdiń 1-ine deıin Qazaqstan Respýblıkasynyń 2017 - 2021 jyldarǵa arnalǵan kóshi-qon saıasaty tujyrymdamasyn ázirleýdi tapsyrdy . 

Budan bólek, Memleket basshysynyń Jarlyǵymen zeınetkerlik jasqa tolýyna baılanysty Aslan Mýsın Qazaqstan Respýblıkasynyń Horvatııa Respýblıkasyndaǵy Tótenshe jáne Ókiletti Elshisi qyzmetinen, Qazaqstan Respýblıkasynyń Bosnııa jáne Gertsegovınadaǵy, Chernogorııadaǵy Tótenshe jáne Ókiletti Elshisi qyzmetin qosa atqarýdan bosatyldy .  Al Qaırat Omarov Qazaqstan Respýblıkasynyń BUU janyndaǵy Turaqty ókili bolyp taǵaıyndaldy .