Kim jeńgenin anyq bilemin – Derevıanchenkonyń promoýteri

NUR-SULTAN. QazAqparat – Ýkraınalyq kásipqoı boksshy Sergeı Derevıanchenkonyń promoýteri Lý DıBella onyń Gennadıı Golovkındi jeńgenine senimdi ekenin aıtty, dep habarlaıdy QazAqparat Sports.kz-ke silteme jasap.

«Golovkın – uly boksshylardyń biri, ol maǵan unaıdy, biraq onyń ózi de keshe durys bokstasa almaǵanyn biledi. Ol jeńe almaǵanyn biledi, men buǵan senimdimin. Bul jerde únemi adamdardyń jeke pikiri sheshedi, adamdar qatelesedi, biraq men kim jeńgenin anyq bilemin», - dedi DıBella.

Eske sala keteıik, tóreshilerdiń sheshimimen, Golovkın – Derevıanchenko jekpe-jegi qazaqstandyqtyń jeńisimen aıaqtalǵan bolatyn. Osylaısha, Gennadıı Golovkın IBF jáne IBO tujyrymdarynyń beldigin qaıtaryp aldy.

Eske salsaq, Nıý-Iorktegi Madison Square Garden arenasynda qazaqstandyq kásipqoı boksshy Gennadıı Golovkın (39-1-1, 35 KO) ýkraınalyq Sergeı Derevıanchenkomen (13-1, 10 KO) jekpe-jek ótkizip, upaı sanymen basym túsken edi.