Kım Serikbaev: Jeńis - jastardy patrıottyq rýhta tárbıeleýdiń jarqyn úlgisi

ALMATY. QazAqparat – Ulttyq kitaphanada Ekinshi dúnıejúlik soǵystyń 75 jyldyǵyna arnalǵan «Uly Jeńis-urpaqqa amanat» atty mereıtoılyq shara ótti, dep habarlaıdy QazAqparat tilshisi.

Saltanatty sharaǵa Ardagerler odaǵy, Almaty qalasynyń dıplomatııalyq korpýsy, halyqaralyq uıymdar, mádenı oshaqtardyń qyzmetkerleri, QR Jazýshylar jáne Jýrnalıster odaǵynyń músheleri, JOO oqytýshylary men stýdentter qatysty.

Kesh barysynda belgili qoǵam jáne memleket qaıratkerleri, zııaly qaýym ókilderi sóz sóıledi.

« Búgin Jeńiske 75 kún qaldy. Men soǵysqa qatysqan joqpyn. Biraq bul surapyl soǵysty jaqsy bilemin. Sebebi, 1941 jyly men mektepke bardym. Ekinshi synypta hat tanydym. «Krasnaıa zvezda», «Sotsıalıstik Qazaqstan» gazetinen maıdangerler týraly oqydym, ásirese qazaqstandyq jaýyngerler týraly bildim. Men mynany aıtqym keledi. Biz jastar arasynda osy Jeńistiń mán-maǵynasy jóninde túsindirý jumystaryn júrgizýimiz kerek. Bul Jeńis - jastardy patrıottyq rýhta tárbıeleýdiń jarqyn úlgisi. Jastarymyz jaýǵa atoı salǵan batyrlarymyzǵa qarap, solardyń erlik isterine qarap boı túzeıdi»,- deıdi professor Kım Serikbaev.

Sondaı-aq, keshte QR Qarýly Kúshteri Ulttyq áskerı-patrıottyq ortalyǵy Almaty fılıalynyń áskerı orkestri, I.V.Panfılov atyndaǵy Qazaqstan-Reseı mamandandyrylǵan №54 mektep-lıtseıi janyndaǵy «Juldyzdar» vokaldy ansambli, «Dıvertısment» skrıpkashylar ansambli, «Slavıan bazary» konkýrsynyń gran-prı ıegeri Ádilhan Makın óner kórsetti.

Saltanatty shara aıasynda Ulttyq kitaphana qorynyń «Uly Jeńiske – 75 jyl» atty kitap kórmesi uıymdastyryldy.

Sonymen qatar, kitaphanada maıdangerler erligin baıandaıtyn fılmderdi kórsetýdiń onkúndigi ashyldy.