«Kim bilgish?» halyqaralyq oılaın-týrnırdiń jeńimpazdary anyqtaldy

NUR-SULTAN. QazAqparat - Búgin «Nazarbaev ortalygy» Damý ortalyǵynda joǵary synyp oqýshylary arasynda ótken «Kim bilgish?» zııatkerlik-tanymdyq oıyny boıynsha halyqaralyq onlaın-týrnırdiń fınaldyń kezeńi men jeńimpazdardy marapattaý rásimi ótti, dep habarlaıdy QazAqparat.

Nursultan Nazarbaev Qorynyń qoldaýymen Memlekettik tildi damytý qory uıymdastyrǵan týrnırge elimizdiń jáne jaqyn sheteldiń 3000-nan astam oqýshysy qatysty.

Zııatkerlik birinshilik 9,10,11 synyptardyń eń bilimdi balalaryn anyqtaýǵa jáne kótermeleýge, tanymdyq qyzyǵýshylyqty jandandyrýǵa, jastardyń mádenı-bilim deńgeıin arttyrýǵa baǵyttalǵan.

2016 jyldan bastap ótkiziletin týrnır jyl saıyn sport, XX ǵasyr, XXI ǵasyr, dóńgelengen álem, óner, Qazaqstan tarıhy, Qazaqstan tabıǵaty, densaýlyq, ǵylym taqyryptaryn qamtyǵan 40 000-ǵa jýyq suraq júktelgen mobıldi qosymsha túrindegi oıyn boıynsha ótkiziledi. Oıyn barysynda qatysýshylar tańdalǵan taqyryp boıynsha suraqtarǵa jaýap berdi (oıynshynyń qalaýy boıynsha qazaq, orys nemese aǵylshyn tilderinde).

«Týrnır jyl saıyn bilimdi balalardy anyqtaıdy, osylaısha olardyń jańa dúnıelerge degen yntasyn oıatady. Jyl saıyn jarysqa elimizdiń barlyq óńirinen myńdaǵan oqýshy qatysqany bizidi qýantady. Birinshilik ózin jáne óz bilimin kórsetýge múmkindik beredi, bul olardyq bolashaq ómirine qajet bolatyn bilim», - dep atap ótti Memlekettik tildi damytý qorynyń dırektory Azat Sháýeev.

Bıyl oıynnyń I jáne II-týrlary jazǵy demalys kezinde qashyqtan, onlaın rejımde ótkizildi.

Nur-Sultanda ótken fınaldyq oıynda 12 úzdik oıynshy erýdıtsııa men reaktsııa jyldamdyǵynda jarysty.

Osylaısha, qazaqtildi oıynshylar arasynda 1-orynǵa Túrkistan oblysynyń Kúltóbe negizgi orta mektebiniń 9-synyp oqýshysy Joltaı Gúlaıym, 2-orynǵa Aqmola oblysynyń №2 orta mektebiniń 9-synyp oqýshysy Qantaı Daýlet, 3-orynǵa Aqmola oblysynyń №2 orta mektebiniń 10-synyp oqýshysy Asylbek Botakóz ıe boldy.

Orys tildi oıynshylar arasynda 1-orynǵa Pavlodar oblysy, Aqsý qalasy, №4 orta mektebiniń 11-synyp oqýshysy Sedova Anastasııa, 2-orynǵa Pavlodar oblysy, Aqsý qalasy, №8 orta mektebiniń 11-synyp oqýshysy Novak Marııa, 3-orynǵa Jambyl oblysy, Taraz qalasy, №3 mektep-lıtseıiniń 11-synyp oqýshysy Orynbasar Asyl ıe boldy.

Týrnırdiń jeńimpazdaryna «2020 jyldyń eń aqyldy oqýshysy» atty arnaıy dıplom men noýtbýk sııaqty baǵaly syılyqtar tabystaldy.

Fınalǵa qatysqan Almaty oblysy, Іle aýdany, Ótegen batyr aýyly, №38 mektep-gımnazııasynyń 10-synyp oqýshysy Darhan Kamıla, Almaty qalasy, №176 mektep-gımnazııasynyń 10-synyp oqýshysy Jalǵas Nuraıdan, Jambyl oblysy, Moıynqum aýdany, Birlik aýyly, Q.Rysqulbekov orta mektebiniń 11-synyp oqýshysy Tólebaı Toqjan, Qyzylorda oblysy, Shıeli aýdany, №46 mektep-lıtseıiniń 11-synyp oqýshysy Kúlimbetov Qablanbek, Aqmola oblysy, Kókshetaý qalasy, Kókshetaý qalasyndaǵy fızıka-matematıka baǵytyndaǵy Nazarbaev Zııatkerlik mektebiniń 12-synyp oqýshysy Bekın Omar arnaıy dıplom men smartfonǵa ıe boldy.