Kilt, estý apparaty, ıne, magnıt – tarazdyq dárigerler sábıler aǵzasynan 100-den astam bógde zat alyp shyqty
Sondaı-aq, byltyr asqorytý jolyndaǵy bógde zattardy alý protsesi 160 ret bolsa, bıyl alǵashqy úsh aıdaǵy jaǵdaı 50-den asypty.
Osydan bir aı buryn tarazdyq dárigerler birneshe ıne jutqan balany aman alyp qalǵan bolatyn. Aımaqta jyl basynan beri balalardyń aǵzasynan osyndaı irili-usaqty 100-ge tarta bógde zat shyǵarylypty. Dárigerlerdiń aıtýynsha, balalardyń aǵzasynan alynǵan zattardyń qatarynda ilgek, túıme, tıyn, kishkentaı qyzdardyń shash túıregishteri, perde ilgish, kilt, maıda oıynshyqtar, tipti estý apparattary bar.
Bógde zattar balanyń aǵzasyna aýyz, muryn, qulaq arqyly túsedi. Tynys alý joldary arqyly kirgen zat muryn ishinde, keńirdekte, ókpe tininde turyp qalýy múmkin. Eń qaýipti jer – kómeı men keńirdek. Tez arada medıtsınalyq kómek kórsetilmese, balaǵa aýa jetpeı 1-2 mınýt ótpeı-aq, kóz jumýy yqtımal. Mundaı jaǵdaılar, ásirese 1-3 jastaǵy sábıler arasynda jıi kezdesedi, - deıdi №2 qalalyq balalar aýrýhanasynyń dárigeri Erjan Serikbekuly.
Aq halattylardyń aıtýynsha, balalarǵa eń qaýip tóndiretin zattyń biri – batareıa. Ol asqazandy kúıdirip jeberedi. Qyshqyl bolǵandyqtan, bala aǵzasynda totyǵyp, óńeshti de shiritip jibere alady. Ekinshisi – magnıt. Onyń kólemi qanshalyqty kishi bolsa, sonshalyqty zııan. Óıtkeni, árqaısysy ár ishekke túsip, bir-birine tartylyp, ishekterdi jabystyryp tastaýy múmkin. Sondaı-aq, tıyndar da qaýipti zattar qatarynda. Sebebi, ol keı balalardyń óńeshin bitep tastaıdy. Al, kámpıt qaǵazdary ókpege aýa ótetin joldy bógeıdi.
Dáriger retinde ata-analarǵa balalardy udaıy jiti baqylaýda ustańyz degim keledi. Sebebi, balalar arasyndaǵy jaraqattan bolatyn ólim-jitim qan aınalym júıesi men onkologııalyq aýrýlardan keıingi úshinshi orynda tur. Biz birneshe magnıt jutyp qoıǵan, birneshe ıneni jutqan balalardy aman alyp qaldyq. Oınap júrgen bala jerde jatqan ıneniń ústine qulap, ol basyna kirip ketken, qalamsaptyń basyn jabatyn zatty kózine kirgizip alyp, ol mıyna qaraı ótip ketken oqıǵalar da boldy. Balanyń bógde zatty jutyp qoıǵanyn onyń áreketterinen birden baıqaýǵa bolady. Tynys alýy men jutýy qıyndap, silekeı ádetten tys kóp aǵady, erin men muryn arasyndaǵy úshburysh kógere bastaıdy. Qımyl-qozǵalysy aýyrlaıdy. Bul jaǵdaıda dárigerdiń kómegine júgingen jón. Birden jedel járdem shaqyrý kerek. Ár aýrýhanada balalar anestezıologi, endoskopısi bolady, - deıdi Jambyl oblystyq kópbeıindi balalar aýrýhanasynyń hırýrgi Elbrýs Salpagarov.
Eske sala keteıik, budan buryn biz Jambylda alǵash ret álemde sırek kezdesetin aýrýǵa shaldyqqan sábıge ota jasalǵanyn jazǵan bolatynbyz.
Elvıra Jarylqasynova