Qylmys áleminiń serkesi bolǵan Kólbaevtyń 720 páteri memleket menshigine ótti

<p>Qyrǵyzstanda kózi joıylǵan qylmys áleminiń serkesi Qamshybek Kólbaevtyń 720 páteri erikti túrde memleket menshigine berildi. Bul týraly Kabar agenttiginde bolǵan baspasóz konferentsııasy kezinde Memleket menshigin basqarý memlekettik agenttigi dırektorynyń birinshi orynbasary Meder Mashıev málim etti, dep habarlaıdy Kazinform.</p>

Onyń sózinshe, áńgime qurylysy aıaqtalmaǵan páterler týraly bolyp otyr. Olar, jospar boıynsha, 2027 jyly salynyp bitedi.

Sondaı-aq, ol budan bólek 2023 jyldyń 10 aıynda memleket menshigine 38 jer telimi men úı jáne 356 kólik ótkenin atap ótti.

Keshe Qyrǵyz Respýblıkasynyń memleket múlkin basqarý agenttigi qylmys áleminiń serkesi Qamshy Kólbaevqa tıesili bolǵan alty avtokólik elektrondyq aýktsıon arqyly satylatynyn málim etkenin jazǵan edik.

Buǵan deıin Qyrǵyzstanda atyshýly qylmystyq avtorıtet Qamshy Kólbaevty (Qamshybek Asanbek) ustaýǵa baǵyttalǵan arnaıy operatsııa júrgizilip, atys kezinde ol qarsylyq kórsetip, UQK arnaıy jasaǵynyń kúshimen kózi joıylǵanyn habarlaǵan bolatynbyz.

Sondaı-aq, Qyrǵyzstanda qylmystyq is aıasynda júrgizilgen jedel-izdestirý sharasynyń barysynda Kólbaevqa tıesili bolǵan, quny 500 myń AQSh dollary bolatyn asyltuqymdy jylqylar tárkilendi.

Memlekettik keden qyzmetiniń 50-ge jýyq qyzmetkeri marqum bolǵan qylmys áleminiń serkesi Qamshy Kólbaevpen tyǵyz baılanysta bolǵany úshin jumystan shyǵaryldy.

Qamshy Kólbaevtyń uıymdasqan qylmystyq toby Qyrǵyzstannyń burynǵy premer-mınıstri Sapar Isakovqa syılaǵan lıýks sanatyndaǵy brondy avtokólik te tárkilengenin eske sala keteıik.