Kıik eti shetelge eksporttala ma – mınıstr jaýaby

<p>Saýda jáne ıntegratsııalar mınıstri Arman Shaqqalıev jýrnalısterdiń kıik etin shetelge eksporttaý jumysy týraly suraǵyna jaýap berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Qazirgi ýaqytta bizdiń mınıstrlikte kıik etin shet elderge satý jospary joq. Tipti ishki naryqta, bazarlarymyzda kıik etin eshqaısymyz kórgen joqpyz. Astana mańaıynda bir kólik et tıegen adamnyń ustalǵany týraly aqparat boldy. Ol zańsyz jumys istegen. Qazir bizdiń quzyret boıynsha Aýyl sharýashylyǵy mınıstrligi kıik etinen konservi, sýbónim jasaýǵa standart jasaýdy surap otyr. Sol standarttaý jaǵynan jumys júrgizip jatyrmyz», - dedi mınıstr elordada ótken baspasóz máslıhatynda.

Mınıstrdiń aıtýynsha, kıik etine qatysty naqty standart bolsa, sertıfıkat, deklaratsııa, tekserý jumystary jolǵa qoıylady.

«Bul suranysqa da baılanysty. Qaı elden (kıik etine – red.) suranys bolsa, sol elge saýda jaǵynan uıymdastyrýǵa kómek kórsetemiz. Eń bastysy, tehnıkalyq retteý men qaýipsizdik jáne sapa talaptaryna saı bolýy kerek», - dedi A. Shaqqalıev.

Buǵan deıin Ekologııa jáne tabıǵı resýrstar mınıstrligi kıikterdi atýǵa ruqsat berilgen aımaqtardy ataǵan edi.