Kıik bıznesin jandandyryp, óndiris tsehtaryn ashý usynyldy

<p>ASTANA. KAZINFORM &ndash; Byltyr Ekologııa mınıstrligi kıikti atýǵa ruqsat bergen bolatyn. Alaıda sońǵy ýaqytta janýardy zańsyz atý faktileri jıilep ketti. &laquo;Azyq-túlik qaýipsizdigi&raquo; atty qazaq sharýalarynyń quryltaıynyń sektsııalyq otyrysynda bul másele jan-jaqty talqylandy.</p>

Kásibı ańshy, kásipker Batyr Seıkenov kıik sanyn retteý jumystary kesh qolǵa alynǵanyn aıtty.

– Aqbóken asa ósimtal janýar. Ómirinde 6 ret tóldeıdi. Mamyrda týǵan quralaılar jeltoqsanda tekeden qashady. Alǵashqy jyly bireýden, kelesi jyly ekeý-úsheýden laqtaıdy. Al endi aqbókender sońǵy jyldary qalaısha shamadan tys kóbeıdi? Oǵan eshkim taldaý jasaǵan joq, onyń qalaı jasalatynyn qazir eshkim bilmeıdi de. Janýardy retteý jumystary erte qolǵa alynýy kerek edi. Kóbeıýdiń kesiri qurǵaqshylyqtan zardap shegip otyrǵan halyqqa áser etip, kıikter mal jaıylymyna ortaqtasyp, shabyndyqty taptap, eginge túse bastady. Tyǵyryqqa tirelgen jaýapty organdar júıeli baǵdarlama ázirleýge úlgermeı, atýǵa ruqsat berdi, – deıdi B.Seıkenov.

Ol jergilikti turǵyndarǵa lıtsenzııa berip, óndiris tsehtaryn ashyp, eki qolǵa bir kúrek taba almaı otyrǵan azamattardy jumyspen qamtý mańyzdy ekenin atap ótti.

– El etin azyq qylyp, múıizi men terisin satyp, paıda tapsyn. Bıznestiń kózine aınalsyn. Ol úshin bul másele ábden zerttelip-zerdelenip, ǵalymdar jumys isteýi kerek. Et pen múıizdi, janýardyń terisin kádege asyrý úshin óndiris ashý kerek. Oǵan arnaıy tońazytqysh, etin múshelep bóletin arnaıy soıý tsehtary qajet. Kıiktiń etiniń eń ótimdi múshesi artqy sany men beldemesi ǵoı. Qalǵanyn óńdeıtin óndiris ashý kerek. Ony eshkim bilmeıdi. Biletin mamandar kerek, - deıdi kásipker.

Aıta keteıik, «Azyq-túlik qaýipsizdigi» atty qazaq sharýalarynyń quryltaıynyń sektsııalyq otyrysynda mal, ósimdik, omarta sharýashylyqtary, veterınarlyq reforma, jer daýy, sý jáne ırrıgatsııa sııaqty máseleler talqylandy.