Kıiz úı túrinde sómke jasaıtyn qazaqstandyqtyń jobasyna Louis Vuitton qyzyǵýshylyq tanytty
Qazaqstandyq magıstrant Aınur Polatova ulttyq oıyndardy nasıhattap, «Talapai» biregeı jobasyn sátti júzege asyrýda. Bıyl názik jan Parıjde qazaq naqyshy bar sómkeniń erekshe dızaınyn tanystyrýdy josparlap otyr.
Ol 2022 jyly «Talapai» startap ıdesyn quryp, EUÝ bıznes-ınkýbatoryndaǵy baıqaýda aqshalaı syılyq utyp aldy. Aınurdyń jobasy erekshe ulttyq dızaınmen jasalǵan. «Bes tas», «Qumar», «Aǵash úı» bestemshesi, «Tumar» bestemshesi, «Toǵyzqumalaq» oıyndary qazaqtyń oıý órnegi bar fýnktsıonaldy qorjyn túrinde usynylǵan.
Úsh aı buryn bastalǵan «Talapai» jobasy qazirdiń ózinde óte tanymal. EUÝ magıstrantynyń aıtýynsha, ulttyq oıyndy satyp alýǵa ótinishter tek qazaqstandyqtardan ǵana emes, Túrkııa, AQSh, Nıderlandy tárizdi shet memleketterden de kelip túsken.
«Qazir sheteldik ústel oıyndary óte kóp. Men bizdiń ulttyq oıyndarymyzdy nege zamanaýı úlgide dáriptemeske dep oıladym. Osylaısha «Talapai» ıdeıasy paıda boldy. Ár oıyn sómke tárizdi aǵashtan jasalǵan qorapta usynylǵan. Ony barlyq jerde alyp júrý yńǵaıly jáne óte jeńil. Eń bastysy – aǵash sómke fýnktsıonaldy, ony ashyp, oıyn oınaýǵa bolady», - dep bólisti qyz.
Osy jyldyń sáýir aıynda Aınur Louis Vuitton ókilderimen kezdesýdi josparlap otyr. Onyń kıiz úı tárizdi sómke jasaý týraly usynysyn álemdegi áıgili brendterdiń biri qoldap, dızaındy talqylaýǵa Parıjge shaqyrdy.
«Jarnamadan Louis Vuitton bizdiń kıiz úıge uqsas dúken ashqanyn kórip qaldym. Bul meni qyzyqtyrdy jáne men olarǵa kıiz úı tárizdi sómke jasaý týraly usynys hat jazdym. Men qazir ulttyq oıyndardy damytý úshin «Talapai» jobasyn júzege asyryp jatqanymdy aıttym, onyń syrtqy qorjyn túrindegi qoraby bizdiń ata-babalarymyzdyń kóshpeli úıine uqsaıdy. Men bul dızaındy ózim jasaımyn jáne Louis Vuitton úshin negizgi ıdeıa oǵan negizdelgen. Eki aptadan keıin kompanııa meniń usynysyma qyzyǵýshylyq bildirip, ózderiniń jaýap hatynda ıdeıany odan ári talqylaý úshin Parıjge shaqyrdy», - deıdi magıstrant
Aınur Polatova kásibı dızaın boıynsha oqymaǵan. Bıyl ol Germanııada, Gete atyndaǵy Frankfýrt ýnıversıtetinde EUÝ akademııalyq utqyrlyq baǵdarlamasy boıynsha bilimin shyńdaıdy.