Qıyn-qystaý zamanda halqymyz qaıyrym, qamqorlyq pen janashyrlyq tanytty - Senat spıkeri
Palata spıkeri qazaqstandyqtardy quttyqtap, Alǵys aıtý kúni dostyq, adamgershilik, ózara kómek sııaqty qundylyqtardy dáripteıtinin atap ótti.
Sondaı-aq ol bul mereke dástúr men tarıhqa kórsetilgen qurmettiń jarqyn kórinisi ekenin aıtty.
«Qıyn-qystaý jyldardyń ózinde halqymyz birlik pen berekeni tý etip, qaıyrymdylyq pen qamqorlyqtyń ozyq úlgisin kórsete bildi. Alǵys aıtý kúninde biz osyndaı taǵylymdy tarıhymyzdy dáripteımiz. Qazirgi tańda yrys pen yntymaqty saqtaý, bul qundylyqtardyń mańyzyn arttyrý aıryqsha mánge ıe», — dedi Máýlen Áshimbaev.
Sonymen qatar Senat tóraǵasy álemde turaqsyzdyq beleń alǵan qazirgi kezeńde halyqtyń zamanaýı syn-qaterlerge birlesip qarsy turýy, beıbitshilik pen kelisimge taban tireýi jáne ózara qurmet pen qoldaýdy nasıhattaýy mańyzdy ekenine nazar aýdardy.
«Memleket basshysy Qasym-Jomart Kemeluly Toqaev birlik pen turaqtylyq bolmasa, saıası jáne ekonomıkalyq reformalardy iske asyrý múmkin emes ekenin únemi aıtyp keledi. Biz jahandyq syn-qater men elimizdegi mańyzdy ózgerister kezeńinde ómir súrip jatyrmyz. Osyndaı sátte árqaısymyz birlik pen jaýapkershiliktiń qadirin tereń túsingenimiz abzal. Beıbitshilik pen kelisimdi nyǵaıtý jolynda judyryqtaı jumylǵan jón. Bul — Otanymyzdyń odan ári ósip-órkendeýine jáne ishki saıası turaqtylyqty qamtamasyz etýge oń yqpalyn tıgizetin qadam. Osy rette Alǵys aıtý kúniniń róli zor. Aldaǵy ýaqytta birligimiz bekemdelip, elimiz órleı bersin», — dedi Senat spıkeri.
Aıta keteıik, is-sharaǵa Mádenıet jáne aqparat vıtse-mınıstri Danııar Qadyrov, Qazaqstan halqy Assambleıasy tóraǵasynyń orynbasary Marat Ázilhanov jáne etnomádenı birlestikterdiń ókilderi de qatysty.