Kıiktiń kóbeıýi egistikti ǵylymı negizde júrgizýge múmkindik bermeıdi - dıqan

ORAL. QazAqparat – Óńirde kıiktiń shamadan tys kóbeıýi egistikti ǵylymı negizde júrgizýge múmkindik bermeıdi. Bul týraly Bókeı ordasy aýdany Bórli aýylynda turatyn «Boranbaev» sharýa qojalyǵynyń basshysy Myrzabaı Boranbaev málimdedi, dep habarlaıdy QazAqparat tilshisi.

Myrzabaı Nurlybaıulynyń aıtýynsha, «Oral aýyl sharýashylyǵy tájirıbe stantsııasy» JShS ǵalymdarymen birlese otyryp, QR Aýyl sharýashylyǵy mınıstrliginiń qoldaýymen júzege asyrylyp jatqan sýarmaly emes jerlerde mal azyqtyq daqyl ósirý baǵdarlamasy aıasynda bıyl 200 gektar jerge jazdyq arpamen birge erkekshóp ekken.

Munyń ereksheligi, arpadan ónim bıyl alynýy kerek bolsa, erkekshóp kelesi jyly shyǵady. Esep boıynsha arpadan gektaryna 15 tsentnerden alynýy tıis bolatyn.

Ókinishke qaraı, egistik alqabyn kıikter taptap, jaramsyz etti.

«Oral aýyl sharýashylyǵy tájirıbe stantsııasy» JShS ókili, aýyl ákimi, aýdandyq máslıhat depýtatynyń qatysýymen júrgizilgen tekseris qorytyndysynda jazdyq arpanyń 80,5 paıyzy joıylǵany anyqtalyp, akt jasaldy.

Osylaısha, memlekettiń qoldaýymen aýyl sharýashylyǵyn kóterý baǵytyndaǵy jumystar zaıa ketýde.

Qojalyq basshysynyń sózine qaraǵanda, kıikter kúzde de tynym berer emes. Avtokólikten, attyly adamnan qoryqpaıdy, ábden úırenip alǵan.

Jaıylym óz aldyna, egistik alqabynda ylǵal izdep, jerdi qazyp, jatady. Budan keıin kelesi jyly erkekshóp te shyǵady dep aıtý qıyn.

«Kıikter qyrlyqta ǵana emes, qum ishinde de tolyp júr. Sonyń saldarynan qasıetti Naryn qumy azyp barady. Shubyrǵan kıik izi saırap jatyr. Ol óz aldyna, óleksesin jınap jatqan eshkim joq. Jalpy, maldy óńir sanalatyn Bókeı ordasy aýdanynda 1 mln 921 myń gektar jer bolsa, sonyń 943 myńy Kapýstın ıAr áskerı polıgonyna berilgen. 400 myń gektary – jaıylymdyq jerler. Іri qarany baǵý úshin ár basqa 9 gektar, jylqyǵa 10,6 gektar kerek. Aýdanda 108 myń iri qara, 36 myń jylqy, 95 myń usaq mal, 1130 túıe bar ekenin eskersek, atalǵan jer tek iri qaraǵa ǵana jetedi. Osyndaı jaıylym jetpeı jatqan kezde ótken jyly «Bókeıorda» rezervaty úshin aýdannan 70 myń gektar jer bólindi. Budan keıin mal sharýashylyǵyn qalaı damytýǵa bolady? Kıik sanyn retteýdi de memlekettik turǵyda júrgizý kerek. Ony aýdan, aýyldaǵy ańshylardyń kómegimen sheshý múmkin emes. Óıtkeni et saqtalmaı, sasyp ketedi. Sondyqtan refrıjatory bar arnaıy brıgadalar shyǵarý qajet», dedi QazAqparat tilshisine M.Boranbaev.

Eske sala keteıik, budan buryn BQO-nyń ońtústik aýdandarynda mal azyǵyn daıyndaýǵa baılanysty qıyndyqtar týyndap otyrǵanyn jazǵan bolatynbyz.

Sondaı-aq BQO ákimi sý men jol problemasy, úsh aýysymdy mektepter, kıik sanyn retteýge baılanysty suhbat berdi.

Sharýa qojalyǵynyń basshysy kıikten qorǵaý úshin egistik jerlerdi qorshaý kerektigin aıtty.