Kıikterdiń qyrylyp jatqan aımaqtary zymyrandardyń qulaıtyn aýdandarynan tym alys - Aeroǵarysh komıteti
Bul týraly búgin QR Parlamenti Senatynyń komıtet otyrysynda QR Investıtsııa jáne damý mınıstrliginiń Aeroǵarysh komıteti tóraǵasynyń mindetin atqarýshy Meıirbek Moldabekov málim etti.
«Kıik jóninde, árıne, bul kıikterdiń qyrylýy ekologııalyq máselege de baılanysty bolýy múmkin. Onyń ishinde ǵarysh aılaǵymen baılanysty bolýy yqtımal, biraq kıikterdiń qyrylyp jatqan aımaqtaryn qarasaq, ol bizdiń «Baıqońyr» ǵarysh aılaǵynan ushyrylyp jatqan zymyrandardyń qulaıtyn, áser etetin aýdandarynan tym alys. Ondaı aýdandar Qaraǵandy oblysynda. Al kıiktiń qyrylyp jatqany Qostanaı, Aqmola, Aqtóbe oblysynda oryn alýda. Soǵan qaraǵanda, tikeleı baılanys joq dep oılaımyn. Biraq qazir biz sony zerttep qaraýymyz kerek», - dedi ol senatorlardyń saýalyna bergen jaýabynda.
Aıta keteıik, sońǵy derekter boıynsha qyrylǵan kıikterdiń sany 100 myńǵa taıap qaldy.