Kıikterdi tálimbaqta zertteýge 750 mln teńge bólinbek
Aldaǵy úsh jylda kıikterdiń popýlıatsııasyn ǵylymı deńgeıde zertteý úshin ýnıversıtet bazasyndaǵy tálimbaqta myńnan astam kıi ósirý josparlanyp otyr. Orman sharýashylyǵy jáne janýarlar álemi komıtetiniń bas sarapshysy Asqar Abdrahmanov osy máselege arnalǵan brıfıngide atalǵan jobaǵa qansha qarajat kerek ekenin aıtty.
«Bizde ǵylymı-tehnıkalyq baǵyttaǵy qarjylandyrýǵa ótinim berilgen bolatyn. Sol ótinim maquldandy. Endi bıýdjetti naqtylaý kezinde, naýryz aıynda bul aqshalar qarastyrylady. Jylyna 250 mln teńge, sonda úsh jylǵa 750 mln teńge bólý kózdelip otyr», - dedi sarapshy.
Buǵan deıin jazǵanymyzdaı, atalǵan maqsatqa bıyl kóktemde 1815 kıiik laǵyn qolǵa úıretý josparlanyp otyr.
«Qazir ań aýlaý obektileri bolyp esepteletin janýarlardy alyp qoıý lımıti bekitilip jatyr. Sonda ǵylymı-zertteý ınstıtýttarynyń, mekemeleriniń ótinimderi boıynsha bıyl 1815 bas kıikti alý kózdelip otyr. Kıikter ǵylymı zertteý maqsatymen ǵana alynady. Jáńgir han atyndaǵy agrotehnıkalyq ýnıversıtetinde 2012 jyldan beri tálimbaq jumys istep tur. Sonyń bazasynda kıikterdi qoldan ósirý jáne jartylaı erkindikte ustaý jumystaryn júrgizedi», - dedi ol.
Foto: gov.kz