Kıikten qorǵaý úshin egistik jerlerdi qorshaý kerek – sharýa qojalyǵynyń basshysy

ORAL. QazAqparat – Batys Qazaqstan oblysynda kıiktiń shekten tys kóbeıip ketýi sharýa qojalyqtaryna orasan zor shyǵyn keltirip otyr. Bul týraly Kaztalov aýdany Aqpáter aýyldyq okrýgindegi «Erǵoja» sharýa qojalyǵynyń basshysy Samat Hasanov aıtty, dep habarlaıdy QazAqparat tilshisi.

Samat Hamzaulynyń málim etkenindeı, kıikter bıyl shabyndyq pen jaıylymdar óz aldyna, egistik jerlerdi taptap ketti.

Onyń sózine qaraǵanda, ótken jyly eki jańbyrlatqysh mashına alyp, bıyl 160 gektar jerge sýdan shóbin ekken eken. Alqaptyń elektr baqtashymen qorshalǵanyna qaramastan, kıikter symdy buzyp ótip, egistikti otap ketken.

Aýdannan komıssııa kelip, akt toltyryp, shyǵyndy eseptegen. Endi ótemaqy tólense dep otyr sharýa qojalyǵynyń basshysy.

«Eń aldymen, árıne, kıik sanyn retteý kerek. Ol úshin et kombınattaryn jandandyryp, kıikten alynatyn ónimderdi óńdep, paıdaǵa jaratqan jón. Áıtse de aqbóken sanyn qansha azaıtsa da, ol kelesi jyly qaıta kóbeıedi. Sondyqtan kıik jaıylymdarda júre bersin, eń bolmasa egistikterdi tormen, eki metr saıyn baǵan qoıyp, qorshaý kerek. Mine, osyǵan úkimet tarapynan demeýqarjy tólense, durys bolar edi. Óıtkeni jyl saıyn ótemaqy tólegenshe, bul áldeqaıda tıimdi. Sýdan jáne basqa ekpeshópti ósirýge sharýa qojalyqtarynyń basshylary qyzyǵýshylyq bildirip, suraıdy. Biraq ony jańaǵydaı jolmen qorshamaıynsha, esh nátıje bolmaıdy», dedi QazAqparat tilshisine S.Hasanov.

Eske sala keteıik, budan buryn BQO-da sharýalar kıikke baılanysty tótenshe jaǵdaı engizýdi surap otyrǵanyn jazǵan bolatynbyz.

Sondaı-aq BQO-nyń ońtústik aýdandarynda mal azyǵyn daıyndaýǵa baılanysty qıyndyqtar týyndap otyr.

BQO ákimi sý men jol problemasy, úsh aýysymdy mektepter, kıik sanyn retteýge baılanysty suhbat berdi.